चितवनमा तीन वटा मोटरसाइकलसहित गोलिया काठ बरामद

चितवन / भरतपुर–११, भोजाडस्थित खगेरी पुल नजिकै तीन वटा मोटरसाइकल र सोही थान गोलिया काठ बरामद गरिएको छ । नवजागृती सामुदायिक वनबाट पदमपुरतर्फ लैजाँदै गरेको अवस्थामा आइतबार राति करिब १ बजे तीन वटा मोटरसाइकल र सोही थान गोलिया काठ बरामद गरिएको जिल्ला प्रहरी कार्यालय चितवनले जनाएको छ ।
प्रहरीका अनुसार ना१६प २०५७, ना६प २६४२ र ग४प ५९४३ नं. को मोटरसाइकलमा लुकाई छिपाई ल्याउँदै गरेको अवस्थामा बरामद गरिएको हो । भोजाडको अस्थायी प्रहरी चौकीबाट खटिएका प्रहरी सहायक निरीक्षकको गस्ती टोलीलाई देख्नासाथ मोटरसाइकल र काठ छोडी ओसापसारमा संलग्न व्यक्तिहरु फरार भएको प्रहरीले जनाएको छ ।
बरामद गरिएको गोलिया काठ र मोटरसाइकल थप अनुसन्धान कार्य भइरहेको चितवन प्रहरी प्रवक्ता विजयराज पण्डितले बताए । ओसारपसारमा संलग्न फरार व्यक्तिहरुको खोजी कार्य जारी रहेको बताइएको छ ।