आज हल्का वर्षाको सम्भावना : मौसम विभाग

काठमाडौं / मौसम पूर्वानुमान महाशाखाले पहाडी भेगमा आज (सोमबार) हल्का वर्षाको सम्भावना रहेको जनाएको छ । पहाडी भेगमा हिजो पनि हल्का वर्षा भएको थियो । हिमाली भेगमा भने हिमपातको सम्भावना छ ।
हाल नेपालमा पश्चिमी वायुको सामान्य प्रभाव छ । साथै प्रि–मनसुन सुरु हुनुभन्दा अगाडिको गतिविधि सक्रिय छ । आज दिउँसो काठमाडौं उपत्यकालगायत विभिन्न स्थानमा हल्का वर्षाको सम्भावना रहेको मौसमविदले बताएका छन् ।
आज प्रदेश १, बागमती र गण्डकी प्रदेशका पहाडी भागका थोरै स्थानहरूमा तथा लुम्बिनी, कर्णाली र सुदूरपश्चिम प्रदेशका पहाडी भागका एक–दुई स्थानमा मेघगर्जनसहित हल्का वर्षाको सम्भावना छ ।
साथै उच्च पहाडी तथा हिमाली भू–भागका थोरै स्थानहरूमा हल्का हिमपातको सम्भावना पनि रहेकाले आवश्यक सतर्कता अपनाउन र मौसम सूचना तथा पूर्वानुमानमा अद्यावधिक रहन महाशाखाले सबैलाई आग्रह गरेको छ ।