छुटफुट सुकुम्बासीलाई जग्गाधनी प्रमाण–पत्र वितरण

चितवन / भरतपुर महानगरपालिका प्रमुख रेनु दाहालले आज (आइतबार) छुटपुट ५ जना भूमिहिन सुकुम्बासीलाई जग्गा धनी प्रमाण–पत्र वितरण गरेकी छन् । जग्गाधनी प्रमाणपत्र पाउनेहरु राष्टिय भूमि आयोग चितवनले भरतपुर–२ आँपटारीमा १ सय ३३ जनालाई जग्गाधनी प्रमाणपत्र (लालपुर्जा) वितरणका क्रममा छुटेको थियो ।
राष्टिय भूमि आयोग चितवनका अध्यक्ष बद्री तिमलसिनाका अनुसार श्रीमान वैदेशिक रोजगारीमा बाहिरा भएकाले लालपुर्जा प्राप्तीको प्रकृया पुगेको थिएन । प्रकृया पूरा भएसँगै अहिले थप ५ जनालाई जग्गाधनी प्रमाणपत्र दिइएको बताए । महानगरपालिकाले आँपटारीबाट भूमिहिन दलितलाई जग्गाधनी प्रमाणपत्र दिएर यो कार्यको थालनी गरेको थियो । लालपूर्जा वितरण कार्यक्रममा महानगरपालिका प्रमुख रेनु दाहालले भूमिहिनलाई भूमिपति बनाउने अभियान जारी राखिएको बताइन् ।
सबै प्रकृया मिलााएर केही समयपछि लालपुर्जा वितरण गर्ने गरी राष्टिय भूमि आयोग चितवनले काम अगाडि बढाई रहेको उल्लेख गरिन् । आयोगका चितवन अध्यक्ष बद्री तिमलसिनाले चितवन क्षेत्र नम्बर २ मा हुन लागेको उपनिर्वाचनका कारण आचारसंहिताले लालपुर्जा वितरणको काम रोकिएको बताए ।
अध्यक्ष तिमलसिनाले निर्वाचनपछि भरतपुर–११ को भूमिहिन दलित र सुकुम्बासी,सेतोपुर्जा भएर अद्यवधिक गर्न बाँकी रहेका, सेतो पुर्जामा एक किस्ता वा दुई किस्ता राजस्व बुझाएका र स्वम सेतो पुर्जा रहेका व्यक्तिलाई लालपुर्जा दिने तयारी भईरहेको जानकारी दिए । आयोगले चितवन जिल्लाभरि नै निस्सा दिने काम सम्पन्न भईसकेको पनि जनाएको छ ।