पानी खुवाइएका गोठका सबै चौपाया मरे

चितवन / चितवनको कालिका नगरपालिका–९ दोगाराका सिताराम थापाले पालेका सबै चौपाया (पशु) मरेका छन् । पानी खुवाएपछि एक घण्टाभित्र आइतबार दिउँसो सबै चौपाया मरेको कालिका नगरपालिकाका पशु सेवा शाखा प्रमुख ईश्वरीप्रसाद पौडेलले जानकारी दिए । उनका अनुसार पानी खाने वित्तिकै चौपायाहरु काम्न थालेका थिए । त्यसको केहि बेरमै चौपायाहरु मरेका हुन् ।
पानीमै विष मिसिएको हुन सक्ने आशंका गरिएको उनले बताए । पशुको पोष्टमार्टम रिपोर्टबाट कारण नखुलेपछि नमुना संकलन गरी परीक्षणका लागि काठमाडौं पठाउने तयारी भएको उनले बताए । ‘बिहानदेखिको कुँढोमा धाराको पानी हालेर दिउँसो ३ बजेतिर सबै पशुलाई दिनुभएको रहेछ । त्यसको एक घण्टाभित्रै सबै पशु मरेको बताइएको छ ।
कुनै रोगले त्यति छिटो पशु मर्दैन, पानीमा विष नै थियो कि भनेर नमुना परीक्षण गर्दैछौँ’, उनले भने । किसान थापाले पालेका एउटा ब्याउने भैंसी, एउटा ठूलो गाई, तीन माउ बाख्रा र दुई वटा खसि मरेका हुन् । पानी खाएपछि सबै पशुको पेट फुलेको थियो । त्यसपछि सबै पशु फिज काट्दै मरेका थिए । घटनाको बिषयमा प्रहरीले पनि अनुसन्धान गरिरहेको छ । तस्बिरः दिपक खड्का