चितवनमा छत्रकुमार पाख्रिनको चुनावी घरदैलो, गोलाकारभित्रको षटकोणमा मतदान गर्न आग्रह

चितवन / बैशाख १० गतेको उपनिर्वाचनलाई लिएर चितवनमा विभिन्न दलहरुको यतिबेला चुनावी सरगर्मी छ । दलहरुले आ–आफ्ना ढंगबाट चुनावी प्रचार प्रसारलाई तीब्र पार्दै लगेको छ । मतदाताहरुलाई विभिन्न तरिकाबाट आकर्षण पार्ने प्रयासलाई दलहरुले निरन्तर जारी राखेको छ ।
यसैबीच राष्ट्रिय मुक्ति आन्दोलन नेपालबाट उमदेवार बनेका छत्रकुमार पाख्रिन (सरोज)ले पनि आफ्नो प्रचार प्रसारलाई तीब्र पारेका छन् । प्रतिनिधि सभाका लागि चितवन क्षेत्र नं. २ बाट उमेदवारी दिएका पाख्रिन (सरोज)ले चुनावी अभियानलाई सशक्त ढंगबाट अघि बढाएको मंगलबार भरतपुरको पत्रकार सम्मेलनमा बताएका हुन् ।
उनले पुराना र ठूला दलबाट देश विकासको सम्भावना टर्दै गएको हुनाले अबको आवश्यकता भनेको राष्ट्रिय मुक्ति आन्दोलन नेपाल भएकोेले उमेदवारी दर्ता गराएको बताए । अब जनताले दलहरुभन्दा माथि उठेर राम्रा उमेदवारलाई मतदान गर्नुपर्ने उनको आग्रह थियो ।
जनाताको माग शिक्षा, स्वास्थ्य तथा भौतिक पूर्वाधारको विकासका लागि आफूले उमेदवारी दर्ता गराएको बताए । उनले चुनावी मुद्दालाई हेरेर मतदान गरिदिन समेत आग्रह गरे । देशमा भ्रष्टाचारको अन्त्य र सुशासन कायम गराउनु बेला आएको बताउँदै सम्पूर्ण मतदाताहरुलाई गोलाकार भित्रको षटकोणमा मतदान गर्न समेत उनले आग्रह गरेका छन् ।
उनले आफ्नो संगठन बलियो भएको र यसपटक जनताले साथ दिने भएकोले जित्ने पक्का भएको दावी गरेका छन् । यसअघि पनि पाख्रिन काठमाडौं उपत्यकाबाट चुनावी लडिसकेका छन् भने विगत दुई दशकदेखि राजनीतिमा छन् ।