चितवन २ उपनिर्वाचन क्षेत्रमा एम्बुलेन्स र दमकल बाहेक सबै सवारीमा रोक

चितवन / बैशाख १० गते अर्थात भोलि (आइतबार) उपनिर्वाचनको मतदानको दिन हो । जिल्ला प्रशासन कार्यालय चितवनले शान्ति सुरक्षालाई मध्यनजर गर्दै चितवन क्षेत्र नं २ भर एम्बुलेन्स र दमकल बाहेकका सवारी साधनलाई सञ्चालनमा रोक लगाइएको छ ।
कार्यालयले एक सूचना जारी गरी चितवन २ मा पर्ने राजमार्गसहितका सबै सडकमा अनुमति लिन नपर्ने अत्यावश्यक सेवा एम्बुलेन्स र दमकल बाहेकका अन्य सवारी साधनलाई रोक लगाउने जनाएको हो ।
यसअघि प्रशासन कार्यालयले राजमार्गमा गुड्ने लामो दुरीका गाडीलाई चल्न दिने बताएको थियो । गृह मन्त्रालयको निर्णय कार्यान्वयन र उच्चस्तरिय निर्वाचन सुरक्षा समितिको निर्णय बमोजिम पछिल्लो निर्णय भएको जिल्ला प्रहरी कार्यालय चितवनका प्रवक्ता विजयराज पण्डितले जानकारी दिए । ‘अनुमति लिन नपर्ने सवारी साधन बाहेकलाई राजमार्गमा पनि सञ्चालनमा रोक लगाउने निर्णय भएको छ’, उनले भने ।
भोलि मतदानको दिन बिहान ६ बजेदेखि बेलुका ६ बजेसम्म चितवन २ भर सवारी सञ्चालनमा रोक लगाइएको हो । चितवन २ मा पूर्व–पश्चिम राजमार्ग, नारायणगढ–मुग्लिन सडक र पृथ्वी राजमार्ग पर्छन् । यो निर्णयसँगै राजमार्ग भएर पूर्व र पश्चिम जाने र काठमाडौँ, पोखरातर्फ जाने लामो दुरीका गाडी पनि सञ्चालन हुन नपाउने भएका छन् ।