‘हक र अधिकारका लागि लड्नु पर्छ’ – अध्यक्ष थिङ

–प्रतिमा तामाङ
चितवन । नेपाल तामाङ घेदुङ जिल्ला समन्वय समिति चितवनका अध्यक्ष बाबुलाल थिङले तामाङ जातिले आफ्ना हक र अधिकारका लागि आफैं लड्नु पर्ने बताएका छन् । अध्यक्ष थिङले अरुलाई दोष दिनुभन्दा हामी आफैं सचेत हुनु पर्ने धारणा व्यक्त गरे । तामाङ पत्रकार संघ जिल्ला शाखा चितवनले मातातीर्थ औंशीको अवसर पारेर आयोजना गरेको शुभकामना आदानप्रदान तथा भित्तेपात्रो विमोचन कार्यक्रममा सो बताएका हुन् ।
कार्यक्रममा बोल्दै थिङले तामाङहरु सशक्त भएर अघि बढ्नु पर्ने सुझाव दिए । हामीले आफूले आफैलाई कमजोर ठान्न नहुने उनको जिकिर थियो । समुदायको लागि मेरो कार्यकालमा समाज रुपान्तरणको लागि सक्ने सहयोग गर्ने उनको प्रतिबद्धता थियो । तामाङ समुदायले गुमाएका हक अधिकारका मुद्दालाई जोड दिने उनको भनाइ थियो ।
उनले तामाङ पत्रकार सँगसँगै अन्य पत्रकारहरुलाई तामाङ जातिको हक अधिकारका मुद्दामा कलम चलाउन आग्रह समेत गरे । पत्रकारहरुको समीप र साथ सहयोगमा रहेर काम गर्न सके छिट्टै नै तामाङ जातिका मागहरु प्राप्त हुने उनको विश्वास थियो । आफ्ना कमी कमजोरीलाई केलाउँदै सकारात्मक रुपले अघि बढ्न सक्यौ भने सिंगो राज्यमा नै तामाङको अधिकार सुनिश्चित गर्न सकिनेमा उनको जोड थियो ।