अक्सफोर्ड कलेजका एक विद्यार्थी बेपत्ता, खोजी गरी दिन अपिल

गैँडाकोट / नवलपुरको गैँडाकोटबाट एक युवक बेपत्ता भएका छन् । गैँडाकोट नगरपालिका वडा नं. ४ शान्तिश्री टोल घर भएका २१ वर्षका डेभिड तिमिल्सिना विहिवारदेखि सम्पर्कविहीन रहेको परिवार स्रोतले जनाएको छ ।
गैँडाकोटकोे अक्सफोर्ड कलेजमा सिभिल ईन्जिनियरिङ फोर्थ सेमेस्टरमा पढ्दै गरेका उनी हालसम्म परिवारको सम्पर्कमा आएका छैनन् । घरबाट कलेज जान्छु भनेर हिडेको बताइएको छ । उनले प्रयोग गर्ने गरेको मोबाइल समेत घरमै छाडेर गएको आमा सुस्मा तिमिल्सिनाले बताइन् ।
इलाका प्रहरी कार्यालय गैँडाकोटले डेभिड तिमिल्सिना हराएको भन्दै खोजीका लागि परिवारको तर्फबाट निवेदन प्राप्त भएको जनाएको छ । प्रहरी वरिष्ठ नायव निरिक्षक मोहन थापाले सम्भावित स्थानहरुको पहिचान गर्दै खोजिकार्य अगाडि बढाइएको भएपनि हालसम्म अवस्था पत्ता लगाउन नसकिएको जानकारी दिए ।