चितवनमा २५६७औं बुद्ध जयन्ती मनाइयो, गुम्बा परिसरमै र्याली

–बबिलाल तामाङ
भरतपुर । चितवनसहित देशैभर २५६७ बुद्ध जयन्ती मनाइएको छ । बौद्ध धर्मावलम्वीहरुले हरेक वर्ष चण्डीपूर्णिमाका दिन विशेष तरिकाले बुद्ध जयन्ती मनाउँदै आएका छन् । यसवर्षको बुद्ध जयन्ती यही बैशाख २२ गते शुक्रबार परेको हो ।
यसैबीच भरतपुर ११ भोजाडमा अवस्थित छेच्यु थर्पलिङ गुम्बामा बुद्ध जयन्ती भव्यसँग मनाइएको अध्यक्ष पञ्चबहादुर लामाले जानकारी दिए । अध्यक्ष लामाका अनुसार गर्मी अत्यधिक भएका कारण गुम्बा परिसरमै तेङ्गुर, कङ्गुर ठेलीहरु (किताब) लिएर ¥याली गरिएको हो ।
पहिलेका पुर्खाहरुले बुद्धजयन्ती जानीनजानी गर्दै आएको र राज्यको दमनको वावजुद पनि धर्मलाई जोगाई यहाँसम्म ल्याउन सफल भएको उनले बताए । बौद्धमार्गीहरुले बुद्धको सन्देश देश विदेशमा फैलाउनु पर्ने हाम्रो साझा कर्तव्य भएकोले सबैको साथ जरुरी भएको उनको भनाइ छ ।
बुद्ध जयन्तीमा गरिने पाठपूजाले इष्टमित्र, आफन्तजन, सम्पूर्ण प्राणी जगतको भलो हुने र शान्ति फैलिने बौद्धमार्गीहरुको विश्वास छ । तामाङ समुदाय जन्मजात बुद्धिष्ट भएकोले सबैले बुद्ध जयन्तीमा सहभागी हुन समेत उनले आग्रह गरे ।
भरतपुर नगर तामाङ सामाजका अध्यक्ष पासाङ तामाङले भावी पिढीको सिकाईको लागि पनि आफ्नो धर्म र संस्कृतिलाई निरन्तरता दिनु आवश्यक भएको बताए । उनीहरुलाई मार्ग निर्देशन गर्न सके मात्रै आफ्नो संकृति बचाउन सकिने उनको भनाइ थियो । गुम्बामा भक्तजनहरुले पूजापाठ, बत्ती बाल्ने र गुरुहरुबाट वाङ (आशीर्वाद) लिइएको थियो ।
गुम्बामा भक्तजनहरुलाई प्रसादका रुपमा खीर, तरकारी, फलफूल वितरण गरिएको हो भने करिब ३ हजार जनाको उपस्थिति रहेको थियो । उक्त गुम्बामा भरतपुरका तामाङ समुदायको संस्कार र संस्कृति सम्बन्धी विभिन्न गतिविधि हुँदै आएको छ ।