आर्थिक वर्ष २०८०–८१ को बजेट आज पारित हुने

काठमाडौं / आर्थिक वर्ष २०८०÷८१ को बजेट राष्ट्रियसभाबाट आज (बिहीबार) पारित हुने भएको छ । यसअघि हिजो (बुधबार) बस्ने भनिएको बैठक प्रधानमन्त्री पत्नी सीता दाहालको निधन भएपछि विशेष कारण देखाउँदै सारिएको हो ।
प्रतिनिधिसभाले पारित गरी राष्ट्रियसभामा पठाएको बजेट अर्थात् विनियोजन विधेयकमाथि छलफल सकिइसकेको छ । विहान १० बजे सुरु हुने बैठकमा उठेका प्रश्नहरुको सम्बन्धित मन्त्रीले जवाफ दिने कार्यसूची रहेको संसद सचिवालयले जनाएको छ ।
त्यसपछि विधेयक अन्तर्गत विभिन्न शीर्षकहरुमा प्राप्त खर्च कटौतीको प्रस्तावलाई राष्ट्रियसभा अध्यक्षले निर्णयार्थ प्रस्तुत गर्नेछन् । त्यसपछि अर्थमन्त्री डा प्रकाशशरण महतले प्रतिनिधिसभाबाट सन्देशसहित प्राप्त विनियोजन विधेयक २०८० लाई पारित गरियोस् भन्ने प्रस्ताव पेश गर्नेछन् ।
आजै बस्ने राष्ट्रियसभाको दोस्रो बैठकमा आर्थिक विधेयकमाथि सैद्धान्तिक छलफल हुने कार्यसूचि रहेको संसद सचिवालयका सह–प्रवक्ता दशरथ धमलाले जानकारी दिए । उनका अनुसार आजै राष्ट्रियसभाको तेस्रो बैठक पनि बस्नेछ । जसमा विद्युतीय व्यापार विधेयक २०८० का सम्बन्धमा सैद्धान्तिक विषयमा छलफल हुनेछ ।