जनकपुरधाम / साना सहरी तथा खानेपानी संस्था मिर्चैयाका सुरक्षागार्डको हत्या घटनाका आरोपमा प्रहरीले दुई जनालाई पक्राउ गरी आइतबार सार्वजनिक गरेको छ । प्रहरीले घटनाको डेढ महिनापछि आइतबार दुई जना अभियुक्तलाई सार्वजनिक गरेको हो ।
पक्राउ पर्नेहरुमा मिर्चैया नगरपालिका–७ का २२ वर्षीय रविन सदा र मिर्चैया–५ का २० वर्षीय दीपक सदा रहेका छन् । खानेपानी संस्थामा सुरक्षार्थ खटिँदै आएका मिर्चैया–७ का ६० वर्षीय किशोरी राय कुर्मीको शव गत असार ११ गते हत्या गरिएको अवस्थामा भेटिएको थियो ।
- ADVERTISEMENT -
घटनाको अनुसन्धानका क्रममा अभियुक्तहरू कार्यालयभित्र रहेको ल्यापटप चोरी गर्न गएको र सुरक्षागार्ड मृतक रायले प्रतिकार गर्दा उनीमाथि चक्कु प्रहार गरी हत्या गरेको खुलेको सिरहा प्रहरीले जनाएको छ ।
पक्राउ परेका दुबै जनाले हत्यामा आफूहरुको संलग्नता रहेको स्वीकारेको सिरहा प्रहरीले जनाएको छ । प्रहरीका अनुसार दुबै अभियुक्त लागुऔषध सेवनकर्ता छन् ।
- ADVERTISEMENT -
