पोर्चुगल / युरोपेली मुलुक पोर्चुगलमा दुई दिनमा दुई नेपाली युवाको मृत्यु भएको छ । एक युवाले चार तलामाथिबाट हामफालेर आत्महत्या गरेका छन् भने अर्का नेपाली युवाको राति सुतेकै अवस्थामा मृत फेला परेको हो ।
राजधानी लिस्बनस्थित सेतेरियोस बस्दै आएका झापाको गौरादह नगरपालिका–३ का ३१ वर्षीय अजय थापाले बिहीबार साँझ चार तलामाथि घरको झ्यालबाट हामफालेर आत्महत्या गरेको गैरआवासीय नेपाली संघले पोर्चुगलले जनाएको छ ।
संघका अध्यक्ष उमेश खड्काले दिएको जानकारी अनुसार, थापाले के कारणले हामफालेर आत्महत्या गरेका हुन् भन्ने विषय खुलेको छैन । वैदेशिक रोजगारीका सिलसिलामा ६ वर्षअघि पोर्चुगल पुगेका थापा पछिल्लो समय खाना डेलिभरी गर्ने कम्पनी उबर इटमा काम गर्दै आएका थिए ।
परिवारसहित पोर्चुगल बस्दै आएका थापाको शव परीक्षणका लागि लिस्बनस्थित एक अस्पतालको शवगृहमा राखिएको उनले बताए ।
यस्तै, वैदेशिक रोजगारीका सिलसिलामा पाँच वर्षअघि पोर्चुगल पुगेका बागलुङको बडिगाड गाँउपालिका–१ का २८ वर्षीय टेकबहादुर दर्लामी मगर सुतेकै अवस्थामा मृत फेला परेका छन् । बेजास्थित जम्बुजिरा बस्दै आएका मगर बुधबार राति सुतेकै अवस्थामा मृत फेला परेको संघका अध्यक्ष खड्काले बताए ।
राति खाना खाएर सुतेका उनी बिहान नउठेपछि उनका साथीहरू उठाउन जाँदा ओछ्यानमै मृत अवस्थामा भेटिएका थिए । सकुशल सुतेका साथी मृत भेटिएपछि उनीहरूले तत्काल प्रहरीलाई खबर गरेका थिए ।
मृतक मगर त्यहाँस्थित मारभिल्ला नामक कृषि कम्पनीमा कार्यरत थिए । उनको शव परीक्षणका लागि बेजा अस्पतालको शवगृहमा राखिएको उनले बताए । मगरको वृद्ध बुवा–आमा र श्रीमती नेपालमा रहेका छन् ।
निधन भएका दुवै नेपालीको शव नेपाल पठाउन मृतकका परिवारले आग्रह गरेका कारण सो विषयमा छलफल र आवश्यक तयारी भइरहेको संघका अध्यक्ष खड्काले बताए ।
