विराटनगर / गाँजा ओसारपसारमा प्रयोग भएको एम्बुलेससहित एक जनालाई प्रहरीले नियन्त्रणमा लिएको छ ।
विराटनगर महानगरपालिका– १८ लाभाघाटबाट गाँजा बोकेको को १ च ४६१९ नम्बरको एम्बुलेन्स र चालक धरान उपमहानगरपालिका– ११ का ३८ वर्षीय गंगा सरकारलाई मंगलबार राति नियन्त्रणमा लिइएको मोरङ प्रहरीले जनाएको छ ।
उक्त एम्बुलेन्स नेपालकै अग्ला व्यक्ति राजन अधिकारीको नाममा धरानमा स्थापित फाउण्डेसनले संचालन गर्दै आएको थियो ।
प्रहरीका अनुसार, मंगलबार राति साढे १० बजे इलाका प्रहरी कार्यालय बुधनगरबाट खटिएको प्रहरी टोलीले चेक जाँचको क्रममा एम्बुलेन्सको डिकीमा राखिएको २१.५ किलो गाँजा बरामद गरेको थियो ।
प्रहरीले सोही स्थानबाट भारतीय नम्बर प्लेट बीआर ३८ एएफ ०३३६ नम्बरको मोटरसाइकल पनि नियन्त्रणमा लिएको छ ।
दुबै सवारीसाधन र चालकलाई नियन्त्रणमा लिई इलाका प्रहरी कार्यालय रानीमा राखेर अनुसन्धान भइरहेको जनाइएको छ ।
