पञ्चशील महाबौद्ध गुम्बामा भोलिदेखि कङ्ग्युर पाठ वाचन सुरु

चितवन / भरतपुर–९, शरदपुरमा स्थित पञ्चशील महाबौद्ध गुम्बामा भोलि (शनिबार) देखि एकहप्ते त्रिपिटक (कङ्ग्युर) पाठ वाचन एवम् धर्म प्रवचन कार्यक्रम हुँदैछ । गुम्बाले यही फागुन ५ देखि १२ गतेसम्म पाठ वाचनको तयारी गरिरहेको बिहीबार आयोजित पत्रकार सम्मेलनमार्फत जानकारी गराएको हो ।
पत्रकार सम्मेलनमा विश्वशान्तिका लागि कङ्ग्युर पाठ वाचन गर्न लागिएको मूल समारोह समितिका संयोजक सन्तलाल गुरूङले जानकारी दिए । विश्वमा फैलिइरहेको अहिंसा र त्रासदीपूर्ण वातावरणलाई शान्त तुल्याउनका लागि गुम्बाले कार्यक्रम आयोजना गरेको उनले बताए । समाजमा राजनीतिक, धार्मिक, आर्थिक एवम् सामाजिक क्षेत्रमा सकारात्मक एवम् ऊर्जाशील सोचको विकास गराउन पनि पाठ वाचन गर्न लागेको उनको भनाइ छ ।
गुम्बाले हरेक तीन÷तीन वर्षको अन्तरालमा पाठ वाचन गर्दै आएको छ । पाठ वाचनमा सङ्कलित हुने रकमलाई गुम्बाचित्र निर्मित बहुउद्देश्यीय भवनमा सुविधासम्पन्न सभाहल निर्माणमा प्रयोग गरिने उनले बताए ।
उनका अनुसार कार्यक्रम अवधिभर विभिन्न धर्मगुरूहरुद्वारा नियमित पाठ वाचन गरिने छ । फागुन ७ गते भने अवतारी टुल्कु रिम्पोछे थब्वाङ तेञ्जिङ गुरूङमार्फत ८४ र ६१ वर्षको पूजा अभिषेक हुने मूल समारोह समितिका संयोजक गुरूङले जानकारी दिए ।
बाँकी दिनहरुमा प्रमुख वाचक एवम् पूजा प्रमुख खेन्पो रिम्पोटे ९डा० दशरथ गुरूङद्वारा नियमित पाठ वाचन हुने आयोजकले जनाएको छ । त्यसबाहेक पनि खेन्पो रिम्पोछे ९डा०हरु रनबहादुर गुरूङ, शीर लामा गुरूङ, सन्तोष गुरूङ, रक्षबहादुर गुरूङलगायतका धर्मगुरूहरुबाट नियमित पाठ वाचन हुने छ ।
मूल समारोह समितिका संयोजक सन्तलाल गुरूङका अनुसार पूजापाठ हरेक दिन बिहान ७ देखि साँझ ६ बजेसम्म हुने छ । प्रवचन भने दिउँसो २ देखि ३ बजेसम्म नियमित हुने उनले बताए ।
फागुन ५ गते पूर्वमन्त्री एवम् प्रतिनिधिसभा सदस्य तथा राप्रपाका वरिष्ठ उपाध्यक्ष विक्रम पाण्डेले उद्घाटन गर्ने कार्यक्रमको समापन भने फागुन १२ गते दिउँसो सम्मानसँगै वाङ, अभिषेक एवम् प्रसाद ग्रहणपछि हुनेछ । २०६३ सालमा स्थापना भएको गुम्बाले कार्यक्रममा सहभागी भइदिन पनि सबैमा अनुरोध गरेको छ ।