चितवन / इच्छाकामना गाउँपालिका–६ जलवीरे नजिक माइक्रोबस दुर्घटना हुँदा तीन यात्रु घाइते भएका छन् भने एक जनाको अवस्था गम्भीर रहेको छ ।
कावासोतीबाट काठमाडौँ जाँदै गरेको ग १ ख ९१५५ नम्बरको माईक्रोबस आज (सोमबार) बिहान ४ बजेको समयमा आफै अनियन्त्रित भई सडकको डिभाइडरमा ठोक्किएको जिल्ला प्रहरी कार्यालय चितवनले जनाएको छ ।
- ADVERTISEMENT -
चितवनका प्रहरी प्रवक्ता भेषराज रिजालका अनुसार डिभाइडरमा ठोक्किदा माईक्रोमा सवार १७ जना मध्ये तीन जना यात्रु घाईते भई उपचारको लागि पुरानो मेडिकल कलेज भरतपुर ल्याइएको हो । माईक्रो चालक माडी नगरपालिका–१ बस्ने वर्ष ३३ को नन्दलाल महतोलाई प्रहरीले नियन्त्रणमा लिएको छ ।
घाइते हुनेहरुमा माईक्रोमा सवार कावासोती नगरपालिका–५ बस्ने वर्ष ६० की सन्तुमाया कुमाल, माईक्रो सहचालक कावासोती–८ बस्ने वर्ष ३६ को धनश्याम न्यौपाने र यात्रु उदयपुर गाईघाट नगरपालिका–१५ बस्ने १९ वर्षीय जेनिस बस्नेत रहेका छन् ।
न्यौपानेको अवस्था गम्भिर रहेको छ भने अन्य दुई जनाको अवस्था मध्यम रहेको प्रहरीले बताएको छ ।
