चितवन / सरकारविरुद्ध आन्दोलन सुरु गरेको नेकपा (माओवादी केन्द्र) ले आज (मंगलबार) चितवनको भरतपुरमा खबरदारी सभा गर्ने जनाएको छ ।
माओवादीका नेताहरूले बेथिति, भ्रष्टाचार, महङ्गी र सरकारको जनविरोधी कदमहरूको विरोधमा यस प्रकारको सभा आयोजना गर्न लागेका हुन् ।
- ADVERTISEMENT -
उक्त सभा नेकपा (माओवादी केन्द्र) का अध्यक्ष पुष्पकमल दाहाल प्रचण्डले सम्बोधन गर्ने कार्यक्रम तय भएको छ । माओवादी केन्द्र चितवनका संयोजक रामचन्द्र अधिकारीले खबरदारी सभा आयोजकको रूपमा यसको विस्तृत जानकारी दिएका छन्।
भरतपुर महानगर समितिको आयोजनामा हुने यो खबरदारी सभामा २९ वडाबाट विशाल जुलुस आउने छ र सभा भरतपुरको २४ कोटीमा भेला हुने कार्यक्रम तय गरिएको छ । महासचिव ईश्वर सापकोटा सुमनले सभा स्थलमा प्रचण्डको सम्बोधन दिउँसो १२ः३० बजे हुने जानकारी दिए।
यसअघि, माओवादी केन्द्रले काठमाडौँमा एक विशाल खबरदारी सभा सम्पन्न गरेको थियो, र अब चितवनमा पहिलो खबरदारी सभा गर्ने योजना बनाइएको हो । यसले माओवादीको आन्दोलनलाई अझ सशक्त र विस्तारित बनाउने लक्ष्य राखेको छ ।
