काठमाडौँ / नेपाली कांग्रेसको पदाधिकारी बैठक पार्टी सभापति शेरबहादुर देउवाको निवास बुढानीलकण्ठमा बस्दैछ । बैठक आज ९सोमबार० बिहान ९ बजेपछि बस्ने गरी बोलाइएको हो ।
बैठकमा पार्टीको क्रियाशील सदस्यता व्यवस्थापन र पछिल्लो समसामयिक राजनीतिक घटनाक्रम, विशेषगरी गृहमन्त्री रमेश लेखकमाथि उठेको प्रश्नबारे छलफल हुने भएको छ । पार्टीका मुख्य सचिव कृष्णप्रसाद पौडेलका अनुसार, सभापति देउवाले मुख्यतया क्रियाशील सदस्यताका विषयमा छलफल गर्न बैठक बोलाएका हुन् ।
- ADVERTISEMENT -
महामन्त्री तथा सदस्यता व्यवस्थापन समितिका संयोजक गगन थापाले क्रियाशील सदस्यता नवीकरणको पछिल्लो अवस्था र प्रगतिबारे बैठकलाई विस्तृत जानकारी गराउने कार्यक्रम रहेको पौडेलले जानकारी दिए । यसका साथै, बैठकमा समसामयिक राजनीतिक घटनाक्रमबारे पनि गम्भीर छलफल हुनेछ ।
विशेषगरी, गृह मन्त्रालयका सहसचिव तीर्थराज भट्टराई घुस प्रकरणमा पक्राउ परेपछि गृहमन्त्री रमेश लेखकको सचिवालय पनि उक्त प्रकरणमा मुछिएको भन्दै उनको राजीनामाको माग चर्को रूपमा उठिरहेको छ । यो विषयले पनि आजको पदाधिकारी बैठकमा प्राथमिकता पाउने देखिएको छ ।
- ADVERTISEMENT -
पार्टीभित्रैबाट केही प्रभावशाली नेताहरूले मन्त्री लेखकमाथि प्रश्न उठ्ने बित्तिकै नैतिकताका आधारमा राजीनामा दिएर छानबिनका लागि मार्गप्रशस्त गर्नुपर्ने सुझाव दिइसकेका छन् । यस सन्दर्भमा पार्टीले आधिकारिक धारणा बनाउने वा नबनाउने भन्ने विषयमा पनि बैठक केन्द्रित हुन सक्ने अनुमान गरिएको छ ।
