– बबिलाल तामाङ
चितवन । सामुदायिक सेवा केन्द्र नारायणगढले लागूऔषध दुव्र्यसनी तथा लैंगिक हिंसा नियन्त्रणसम्बन्धी जनचेतनामूलक कार्यक्रम गरेको छ । समाजमा बढ्दो लागूऔषध र लैंगिक हिंसा न्युनीकरण गर्ने उद्देश्यले कार्यक्रम गरिएको सामाजिक अभियन्ता तथा सामुदायिक सेवा केन्द्र नारायणगढ सह–संयोजक सुरज सापकोटाले जानकारी दिए ।
- ADVERTISEMENT -
भरतपुर महानगरपालिका वडा नं. २ का अध्यक्ष मनोज रानाभाटले समाजमा बढ्दै गएको लागूऔषध तथा लैंगिक हिंसा रोकथामका लागि सबैको सहयोग अपरिहार्य रहेको बताए । कार्यक्रममा प्रमुख अतिथिसमेत रहेका वडाअध्यक्ष रानाभाटले समाजमा बालबालिकाहरु नै बढी लागूऔषधतिर धकेलिँदै गइरहेको बताउँदै यस्तो विकराल स्थितिलाई न्युनीकरण गर्न समाज नै सचेत हुनुपर्ने बताए ।
भरतपुर–२, क्षेत्रपुरस्थित पवित्र इङलिस स्कूलमा भएको कार्यक्रममा सामुदायिक सेवा केन्द्र नारायणगढका प्रहरी सहायक निरीक्षक विकुल मजाकोटीले समाजमा लागूऔषध दुव्र्यसनी र लैंगिक हिंसा रोक्ने उपायबारे प्रशिक्षण दिएका थिए ।
कार्यक्रममा जिल्ला प्रहरी कार्यालय चितवनका प्रहरी सहायक निरीक्षक दिपेश क्षेत्री, सामुदायिक सेवा केन्द्र नारायणगढका लागूपदार्थ दुव्र्यसनी रोकथामका संयोजक नारायण सुवाल, पवित्र स्कुलका शिक्षक, विद्यार्थीलगायत करिब ८० जनाको उपस्थिति थियो । पवित्र इङ्लिस स्कूलका प्राचार्य अर्जुन सुनारको अध्यक्षतामा भएको कार्यक्रम सामुदायिक सेवा केन्द्र नारायणगढकी सदस्य रेनु तामाङले सञ्चालन गरेकी थिइन् ।
लागूऔषध तथा लैंगिक हिंसा न्यूनीकरणका लागि सामुदायिक सेवा केन्द्र नारायणगढले जनचेतना फैलाउन विभिन्न खालका कार्यक्रम सञ्चालन गर्दै आइरहेको छ ।
