काठमाडौं / मुलुकको राजनीतिमा वैकल्पिक शक्तिको खोजी भइरहेका बेला दुई चर्चित अनुहार राष्ट्रिय स्वतन्त्र पार्टी (रास्वपा) का सभापति रवि लामिछाने र काठमाडौं महानगरपालिकाका मेयर बालेन्द्र शाह (बालेन) बीच एउटै कित्तामा उभिने सहमति भएको छ । सोमबार राति अबेरसम्म चलेको निर्णायक वार्ताले दुई नेताबीचको दूरी मेटाउँदै सहकार्यको आधार तय गरेको हो ।
‘जेनजी’ आन्दोलनपछि विकसित राजनीतिक परिस्थिति र आसन्न निर्वाचनलाई केन्द्रमा राखेर गरिएको यो सहकार्यलाई वैकल्पिक राजनीतिको ‘कोर्स करेक्सन’ का रूपमा हेरिएको छ । सोमबार कमलपोखरीस्थित रास्वपा नेता असिम शाहको कार्यालयमा भएको करिब ६ घण्टा लामो ‘म्याराथन’ छलफलपछि दुवै नेता मिलेर अघि बढ्ने निष्कर्षमा पुगेका हुन् ।
- ADVERTISEMENT -
बिहानको प्रारम्भिक भेटपछि साँझ पुनः जुटेका लामिछाने र शाहबीचको संवाद निकै सघन भएको थियो । वार्ता निष्कर्षमा पुगेपछि राति १ः४२ बजे दुवै नेता एउटै गाडीमा बाहिरिएका थिए । यो दृश्यलाई पुष्टि गर्दै रास्वपा नेता असिम शाहले मध्यरातमा सामाजिक सञ्जालमा लेखेका छन्, ‘अन्ततः कथाको सुखद सुरुवात भएको छ । रवि र बालेन (दुई दाजुभाइको मिलन भएको छ । यो व्यक्तिको मात्र होइन, देशले खोजेको आशाको मिलन हो ।’
स्रोतका अनुसार, दुई नेताबीचको छलफल केवल सामान्य भेटघाटमा सीमित थिएन । उनीहरूले आगामी निर्वाचनअघि नै छरिएर रहेका सबै वैकल्पिक शक्तिलाई एउटै प्लेटफर्ममा ल्याउने रणनीति बनाएका छन् । यसका लागि शक्ति बाँडफाँट र सहकार्यको ‘मोडल’ टुंग्याउन दुवै पक्षका टिमले गृहकार्य गरिरहेका छन् ।
त्याग गर्न तयार रवि, सकारात्मक बालेन
न्यायिक हिरासतबाट रिहा भएलगत्तै राजनीतिक भेटघाटलाई तीव्रता दिएका लामिछानेले नयाँ शक्तिहरूको एकताका लागि आफू ‘बाधक’ नबन्ने सन्देश दिइसकेका छन् । उनले शनिबार मात्रै एक सार्वजनिक कार्यक्रममा नयाँ दलहरू मिल्ने सर्तमा पहिलो त्याग आफूले गर्ने घोषणा गरेका थिए ।
छलफलमा सहभागी जेनजी अगुवा सुदन गुरुङका अनुसार दुवै नेता ‘ओपन माइन्डेड’ भएर प्रस्तुत भएका कारण सहमति जुट्न सहज भएको हो । ‘कसको भूमिका के हुने र अगाडि कसरी बढ्ने भन्ने विषयमा ठोस छलफल भइरहेको छ,’ गुरुङले भने, ‘जनताको चाहना र जेनजीको भावनालाई कदर गर्दै उहाँहरू एक ठाउँमा आउनुभएको हो ।’
रवि र बालेनको मिलनलाई मात्रै अन्तिम विन्दु मानिएको छैन । यो अभियानमा अन्य स्वतन्त्र र लोकप्रिय छवि भएका व्यक्तित्वहरूलाई पनि समेट्ने प्रयास थालिएको छ । लामिछानेले आइतबार मात्रै पूर्वप्रधानन्यायाधीश सुशीला कार्कीसँग एक्लाएक्लै भेटवार्ता गरेका थिए ।
यसैगरी, रास्वपा वृत्तबाट प्राप्त जानकारी अनुसार ऊर्जामन्त्री कुलमान घिसिङसँग पनि सहकार्यका लागि संवाद अघि बढाउने तयारी भइरहेको छ । घिसिङ पनि यो नयाँ ध्रुवीकरणप्रति सकारात्मक रहेको बताइएको छ । सोमबारको वार्तामा रास्वपा उपसभापति डिपी अर्याल र मेयर शाहका सहयोगी कुमार बेनको पनि उपस्थिति थियो ।
