– बबिलाल तामाङ
चितवन । भरतपुर महानगरपालिका वडा नं २, क्षेत्रपुरस्थित सिद्धि विनायक बचत तथा ऋण सहकारी संस्था लि. (साकोस) ले उपसमिति सदस्य तथा कर्मचारीहरुलाई सहकारी सम्बन्धी प्रशिक्षण दिएको छ ।
कार्यक्रममा संस्थागत जानकारी, काम, कर्तव्य र अधिकार विषयक दायित्यबोध गराउने उद्देश्यले बिहीवार उक्त प्रशिक्षण दिइएको संस्थाका अध्यक्ष थिरप्रसाद धितालले जानकारी दिए ।
- ADVERTISEMENT -
कार्यक्रमका प्रशिक्षक समेत रहेका अध्यक्ष धितालले आफूले सिकेका सिपलाई व्यवहार उतार्नु पर्नेमा जोड दिए । उनले आफ्नो जिम्मेवारीलाई सबैले आत्मसाथ गर्दै सबैले आ–आफ्नो ठाउँबाट संस्थागत विकास र उन्नयनका लागि प्रतिबद्ध हुन आग्रह गरे ।
कार्यक्रमका प्रमुख अतिथि तथा संस्थाका संस्थाका संस्थापक अध्यक्ष शालिकराम घिमिरेले व्यानर वाचन गरेर शुभारम्भ गरेका हुन् । उद्घाटनपछि बोल्दै प्रमुख अतिथि घिमिरेले शेयर सदस्यहरूका लागि सहकारी सम्बन्धी प्रशिक्षण अपरिहार्य भएको बताए । हरेक शेयर सदस्यले संस्थाको गतिविधि बारे जानकारी लिनु पर्ने उनको भनाइ थियो ।
संस्थाका व्यवस्थापक विकास पौडेलले संस्थागत जानकारी बारे प्रकाश पारेका थिए । कार्यक्रममा सबै उपसमिति सदस्य तथा कर्मचारीहरुले संस्थालाई जोगाउन आफ्नो ठाउँबाट सहयोग गर्ने प्रतिबद्धता व्यक्त गरेका थिए ।
संस्थाका अध्यक्ष थिरप्रसाद धितालको अध्यक्षतामा सम्पन्न भएको कार्यक्रममा सचिव जयराम पाण्डेले सञ्चालन गरेका हुन् । कार्यक्रममा उपाध्यक्ष मुकुन्दप्रसाद गौतम, कोषाध्यक्ष रामप्रसाद घिमिरे, सहसचिव संगीता सिग्देल गौतम, लेखापरीक्षण समिति संयोजक विनोद पौडेल, इन्दिरा लामिछाने, कृष्ण सिलवाल, शंकर भेटुवाललगायतको उपस्थिति रहेको थियो ।
विसं. २०६५ सालमा स्थापना भएको यस साकोसले विशेषगरी शेयर सदस्य लक्षित सेवामुखी कार्यक्रम गर्दै आएको छ । संस्थामा हाल दुई हजार बढी सेयर सदस्य रहेका छन् ।
