काठमाडौं / आगामी फागुन २१ गते हुने प्रतिनिधिसभा सदस्य निर्वाचनका लागि राष्ट्रिय स्वतन्त्र पार्टी (रास्वपा) ले आफ्नो चुनावी रणनीतिलाई तीव्रता दिएको छ । यसै क्रममा पार्टीले निर्वाचन आयोगमा ११० जना उम्मेदवारहरूको समानुपातिकतर्फको बन्दसूची मध्यराति पेस गरेको छ।
पार्टी सभापति रवि लामिछाने, ‘उज्यालो नेपाल’का अभियन्ता कुलमान घिसिङ र काठमाडौँ महानगरपालिकाका मेयर बालेन शाहबिच आगामी निर्वाचनमा सहकार्य गर्ने ऐतिहासिक सहमति भएको भोलिपल्टै रास्वपाले यो सूची सार्वजनिक गरेको हो ।
- ADVERTISEMENT -
रास्वपाको यस बन्दसूचीमा समाजका विभिन्न क्षेत्रमा ख्याति कमाएका व्यक्तिहरूको बाहुल्यता देखिएको छ । सूचीमा नेपाली क्रिकेट टोलीका पूर्व कप्तान ज्ञानेन्द्र मल्ल, चर्चित गायक प्रकाश सपूत, सामाजिक अभियन्ता रञ्जु दर्शना, सञ्चारकर्मी रमेश प्रसाईँ जस्ता प्रभावशाली व्यक्तित्वहरू समावेश छन् ।
साथै, डा. राम लामा, डा. महेन्द्र लावती, डा. ओजस्वी शेरचन, डा. निना रेग्मी पोखरेल जस्ता विषयगत विज्ञहरूलाई पनि रास्वपाले समानुपातिक उम्मेदवार बनाएको छ । समावेशिताको मर्मलाई ध्यान दिँदै पार्टीले आदिवासी जनजाति, खस आर्य, थारु, दलित, मधेसी र मुस्लिम समुदायका प्रतिनिधिहरूलाई सूचीमा समेटेको छ ।
