काठमाडौं / वैकल्पिक राजनीतिको केन्द्र बन्ने लक्ष्य राखेको राष्ट्रिय स्वतन्त्र पार्टी (रास्वपा) ले आज (आइतबार) आफ्नो सांगठनिक विस्तारमा महत्वपूर्ण फड्को मार्दैछ । तराई–मधेश र विशेषगरी थारुवान क्षेत्रमा बलियो पकड भएका नेता–कार्यकर्ताहरूलाई समेट्दै रास्वपाले दिउँसो १ बजे ‘बृहत राजनीतिक समायोजन घोषणा सभा’ आयोजना गर्न लागेको हो ।
काठमाडौँको प्रदर्शनीमार्गस्थित राष्ट्रिय सभा गृहमा हुने विशेष समारोहबीच नागरिक उन्मुक्ति पार्टी (नाउपा) का पूर्वनेतृत्व र थरुहट–थारुवान आन्दोलनका स्थापित अभियान्ताहरू औपचारिक रूपमा रास्वपामा प्रवेश गर्ने तय भएको छ । रञ्जिता श्रेष्ठ नेतृत्वको नागरिक उन्मुक्ति पार्टीभित्र पछिल्लो समय चुलिएको वैचारिक मतभेद र नेतृत्वको कार्यशैलीप्रति असन्तुष्टि जनाउँदै ठुलो पंक्तिले पार्टी परित्याग गरेको छ । विशेष गरी रञ्जिता श्रेष्ठ नेपाल कम्युनिस्ट पार्टीमा प्रवेश गरेपछि नाउपाभित्र पहिरो गएको हो ।
- ADVERTISEMENT -
सोही असन्तुष्टिका बीच नाउपाका रुपन्देही जिल्ला अध्यक्षसहित ३३ जना प्रभावशाली नेताहरूले सामूहिक राजीनामा दिएका छन् । रास्वपाका प्रवक्ता मनिष झाका अनुसार, यो केवल व्यक्तिहरूको प्रवेश मात्र नभई एजेण्डाहरूको फ्युजन पनि हो । थरुहट र थारुवान आन्दोलनले उठाएका मुद्दाहरू र रास्वपाले परिकल्पना गरेको ‘डेलिभरी’ केन्द्रित राजनीतिबीचको सामञ्जस्यता आजको समायोजनको मुख्य आकर्षण रहनेछ ।
