काठमाडौं । नेपाली कांग्रेसभित्रको आन्तरिक विवाद र रस्साकस्सीका बिच आज (आइतबार) देखि राजधानीमा ‘विशेष महाधिवेशन’ सुरु हुँदैछ । पार्टीको आधिकारिक संस्थापन पक्षले औचित्य नभएको भन्दै खारेज गरे पनि विशेष महाधिवेशन पक्षधर समूहले पूर्वघोषित कार्यक्रम अनुसार नै भृकुटीमण्डपमा महाधिवेशन गर्न लागेको हो ।
काठमाडौँको भृकुटीमण्डपस्थित खुला चौरमा दिउँसो १ः०० बजे महाधिवेशनको औपचारिक उद्घाटन हुनेछ । यसलाई असन्तुष्ट पक्षले आफ्नो शक्ति प्रदर्शनको रूपमा समेत लिएको देखिन्छ । मञ्च व्यवस्थापन समितिका संयोजक गोविन्द पुडासैनीका अनुसार, उद्घाटन सत्रका लागि ५० जना विशिष्ट अतिथि अटाउने मञ्च र सहभागीहरूका लागि ६ हजारभन्दा बढी कुर्सीको व्यवस्था गरिएको छ ।
- ADVERTISEMENT -
कार्यक्रम स्थललाई कांग्रेसको चारतारे झण्डा, ब्यानर र स्वागत द्वारहरूले झकिझकाउ बनाइएको छ । उपत्यकाका विभिन्न स्थानबाट निस्कने र्यालीलाई व्यवस्थित रूपमा भृकुटीमण्डपमा उतार्ने तयारी आयोजकले गरेको छ । उद्घाटन सत्रको सभापतित्व कांग्रेस काठमाडौँका सभापति कृष्ण सबुज बानियाँले गर्ने तय भएको छ । महाधिवेशनमा अन्य राजनीतिक दलका नेताहरूलाई आमन्त्रण गरिएको छैन ।
महाधिवेशनमा भाग लिन देशैभरबाट कांग्रेस कार्यकर्ता र महाधिवेशन प्रतिनिधिहरू काठमाडौँ आइसकेका छन् । आयोजक समितिका अनुसार अधिकांश प्रतिनिधिहरूको उपस्थिति सुनिश्चित भइसकेको छ ।
आवास तथा भोजन व्यवस्थापन समितिका संयोजक रमेश धमलाले दिएको जानकारी अनुसार, हालसम्म ३ हजार ६०० प्रतिनिधिका लागि काठमाडौँका विभिन्न स्थानमा आवासको प्रबन्ध मिलाइएको छ । थप प्रतिनिधि आएमा तत्काल व्यवस्थापन गर्न सकिने गरी तयारी अवस्थामा राखिएको छ । प्रतिनिधिहरूले १ हजार दर्ता शुल्क बुझाएपछि खानाको कुपन र महाधिवेशन सामग्रीसहितको झोला प्राप्त गर्ने व्यवस्था मिलाइएको छ ।
उद्घाटन सत्र खुला चौरमा भए पनि बन्दसत्र भने भृकुटीमण्डपको सभाहलमा सञ्चालन हुनेछ । बन्दसत्रमा पेस हुने नीतिगत प्रस्ताव र दस्तावेजहरूका विषयमा भने आयोजकले हालसम्म गुपचुप नै राखेको छ ।
संस्थापन पक्ष भन्छ– महाधिवेशनको औचित्य सकियो
यता, पार्टी सभापति शेरबहादुर देउवा नेतृत्वको संस्थापन पक्षले भने नियमित १५औँ महाधिवेशनको मिति तोकिसकिएकाले विशेष महाधिवेशनको माग स्वतः खारेज भएको तर्क गरेको छ ।
कांग्रेस केन्द्रीय कार्यसम्पादन समितिले आगामी वैशाख २८ देखि ३१ गतेसम्म १५औँ महाधिवेशन गर्ने निर्णय गरिसकेको छ । संस्थापन पक्षले विशेष महाधिवेशनको औचित्य समाप्त भएको बताइरहँदा पार्टीका महामन्त्रीद्वय गगनकुमार थापा र विश्वप्रकाश शर्मासहित पाँच नेताले भने संस्थापनको उक्त निर्णयमा ‘नोट अफ डिसेन्ट’ (असहमति) जनाएका छन् ।
