चितवन / आगामी फागुन २१ गते संविधान सभा निर्वाचन लक्षित भरतपुरमा श्रम संस्कृति पार्टीले मंगलबार घोषणापत्र सार्वजनिक गरेको छ ।
पार्टीको चितवन समितिले मङ्गलबार पत्रकार सम्मेलन मार्फत् जिल्लाका उमेदवारसहित घोषणापत्र सार्वजनिक गरेको हो । चितवनको तीनवटै निर्वाचन क्षेत्रमा प्रत्यक्षतर्फ उमेदवार श्रम संस्कृति पार्टीका जिल्ला अध्यक्ष लेखबहादुर पुनले जानकारी दिए ।
- ADVERTISEMENT -
अध्यक्ष पुनका अनुसार क्षेत्र नं १ मा अनिल तामाङ, क्षेत्र नं २ मा मिलन थापामगर र क्षेत्र नं ३ मा तोजमान गुरूङलाई उमेदवार बनाएको हो । पार्टीले पछिल्लो समय पुराना दलहरुप्रति देखिएको वितृष्णाले पनि श्रम संस्कृति पार्टीले निर्वाचन जित्ने आकलन गरेको छ । तीनवटै निर्वाचन क्षेत्रमा जित निकाल्न जिल्ला समिति एक ठाउँमा उभिएको उनले बताए ।
पार्टीले श्रम र सम्मानलाई जोड्दै ‘अब भाषणको खेती होइन, श्रमको क्रान्ति’ भन्ने नारा लिएको छ । घोषणापत्रमा ‘नेपाली राजनीतिमा नयाँ विकल्प’ उदाएको उल्लेख छ ।
जनताका विभिन्न आशा र अपेक्षा बोकेर वर्षौं बिताएका दलहरुबाट कुनै उपाय नलागेपछि नयाँ शक्तिको रुपमा श्रम संस्कृति पार्टीको उदय भएको भन्दै प्रतिनिधिसभाको आसन्न निर्वाचनमा जनताको साथ र सहयोगबाट बहुमत लिएर संसद्मा पुग्ने पार्टीले दाबी गरेको छ ।
नेपालको राजनीतिक इतिहासमा विगतदेखि नै ठूला दलहरुले सत्ता र शक्तिकेन्द्रित राजनीति गरेको आरोप लगाउँदै अबका दिनमा श्रमिक, किसान, युवालगायत आमनागरिकको जीवनस्तर उकास्ने र परिवर्तन गर्ने नीतिगत कार्यक्रम अघि सारेको पार्टीका चितवन जिल्ला प्रवक्ता शिव शर्माद्वारा सार्वजनिक घोषणापत्रमा उल्लेख छ ।
उत्पादनमुखी अर्थतन्त्र, स्वदेशी श्रम र सीपको सम्मान, आत्मनिर्भर राष्ट्रिय अर्थतन्त्र निर्माण गर्ने प्रतिबद्धतासमेत घोषणापत्रमार्फत सार्वजनिक गरिएको छ । देश विकासमा विदेशी निर्भरता घटाउँदै स्वदेशमै कृषि, उद्योगलाई प्राथमिकतामा राखेर काम गर्ने पार्टीले नीति लिएको छ ।
एक गाउँ, एक उद्योग र एक व्यक्ति, एक उद्यमको अवधारणा अघि सार्दै स्वदेशमै रोजगारी सिर्जना गरेर गरिबी न्यूनीकरण गर्ने विषयलाई पनि घोषणापत्रमा समटिएको छ । सुशासन, सामाजिक न्याय, प्राकृतिक स्रोतको संरक्षण, स्थानीय उत्पादनको प्रवद्र्धन, प्रविधिको विकास, शिक्षा, स्वास्थ्यमा सुधारजस्ता विषयलाई पनि घोषणापत्रमा प्राथमिकतामा राखिएको छ ।
घोषणापत्र सार्वजनिक गर्ने क्रममा क्षेत्र नं १ का उमेदवार अनिल तामाङले समाजमा संस्कार परिवर्तनका लागि प्रतिनिधि चुन्ने समय आएको बताए । ‘हामी संसद्मा प्रतिनिधि बदल्नमात्रै निर्वाचनमा होमिएका होइनौँ, संस्कार पनि बदल्नुपर्छ भनेर आएका छौँ’, उनले भने, ‘त्यसका लागि फागुन २१ सुनौलो अवसर हो ।’
क्षेत्र नं २ का उमेदवार मिलन थापामगरले विचार र चेतनाको क्रान्तिमार्फत समाज रुपान्तरण गराउन आफूहरु उमेदवारको रुपमा जनताको घरदैलोमा आइपुगेको बताए । श्रमदानबाटै देश बनाउन सकिन्छ भन्ने अठोटका साथ हर्कवादको सिद्धान्त बोकेर जनतासामु उभिएको उनले बताए । परिणाममुखी व्यवस्थाको खोजी, इमानदार नेतृत्वका लागि मतदाताले आफ्नो अधिकार प्रयोग गर्न पाउने राम्रो मौका मिलेको उनको भनाइ छ ।
