काठमाडौं / रौतहटको सदरमुकाम गौरमा दुई समुदायबीच उत्पन्न तनावका कारण लगाइएको कर्फ्यु आज (आइतबार) पनि जारी रहने भएको छ । जिल्ला प्रशासन कार्यालयले स्थिति थप बिग्रन नदिन र सुरक्षा संवेदनशीलतालाई ध्यानमा राख्दै शनिबारदेखि जारी कर्फ्युलाई परिमार्जनसहित निरन्तरता दिएको हो ।
प्रमुख जिल्ला अधिकारी दिनेश सागर भुसालद्वारा जारी संशोधित आदेश अनुसार शनिबार दिउँसो १ बजेदेखि सुरु भएको कर्फ्यु आज बिहान ६स्३० बजेसम्म यथावत रहनेछ । सर्वसाधारणको सुविधा र अत्यावश्यक कामका लागि बिहान ६स्३० बजेदेखि ८स्३० बजेसम्म दुई घण्टाका लागि कर्फ्यु केही खुकुलो पारिएको छ ।
- ADVERTISEMENT -
यद्यपि, खुकुलो पारिएको सो समयमा पनि कुनै पनि किसिमका भेला, सभा, जुलुस, प्रदर्शन वा मानिसहरू जम्मा हुन पाइने छैन । बिहान ८स्३० बजेपछि अर्को आदेश नभएसम्मका लागि पुनः पूर्ण रूपमा कर्फ्यु लागू हुने प्रशासनले स्पष्ट पारेको छ ।
स्थानीय प्रशासन ऐन, २०२८ को दफा ६ ‘क’ बमोजिम जारी गरिएको यो आदेशको उल्लंघन गर्ने जोकोहीलाई कानुन बमोजिम कडा कारबाही गरिने चेतावनी समेत दिइएको छ । कर्फ्यु अवधिमा तोकिएको क्षेत्रभित्र हिँडडुल गर्न र आवतजावत गर्न पूर्णतः निषेध गरिएको छ ।
