काठमाडौं / पोखराबाट काठमाडौँतर्फ जाँदै गरेको यात्रुवाहक बस धादिङमा दुर्घटना हुँदा १७ जनाको मृत्यु भएको छ । पृथ्वी लोकमार्गअन्तर्गत धादिङको बेनिघाट रोराङ गाउँपालिका–५ भैँसीगौडामा आज (सोमबार) बिहान करिब १ः३० बजे बस त्रिशूली नदीमा खसेको हो ।
ग १ ख १४२१ नम्बरको माछापुच्छ्रे ट्राभल्सको बस सडकबाट सिधै नदीमा खस्दा १७ यात्रुको ज्यान गएको सशस्त्र प्रहरी बलले पुष्टि गरेको छ । सशस्त्र प्रहरी बलका प्रवक्ता विष्णुप्रसाद भट्टका अनुसार हालसम्म १७ जनाको शव निकालिएको छ भने दुर्घटनामा २८ जना घाइते भएका छन् ।
- ADVERTISEMENT -
बसमा चालकसहित ४५ जना सवार रहेको प्रहरीको तथ्याङ्क छ । जसमध्ये ४३ जना पोखराबाट र २ जना मुग्लिनबाट चढेका थिए । दुर्घटना लगत्तै सशस्त्र प्रहरी बलको आदमघाटस्थित विपद् व्यवस्थापन वेशबाट सशस्त्र प्रहरी नायब उपरीक्षक सुनिल गिरिको कमाण्डमा टोली खटिएको थियो । यस्तै, कुरिनटारस्थित विपद् व्यवस्थापन तालिम शिक्षालयबाट गोताखोरसहितको टोलीले उद्धार कार्य जारी राखेको छ ।
सशस्त्र प्रहरीका सहायक प्रवक्ता शैलेन्द्र थापाले घाइते २८ जनाको उद्धार गरी उपचारका लागि विभिन्न अस्पताल पठाइएको जानकारी दिए । उनले घाइतेहरूको सनाखत भए पनि मृतकहरूको पहिचान खुल्न बाँकी रहेको बताए । ‘उद्धार कार्यमा नेपाली सेना, नेपाल प्रहरी र सशस्त्र प्रहरीको टोली समन्वयकारी रूपमा खटिएको छ,’ उनले भने ।
दुर्घटनाको कारण अझै खुल्न सकेको छैन । तीव्र गति वा चालक निदाएका कारण बस दुर्घटना भएको हुनसक्ने प्रारम्भिक अनुमान गरिए पनि प्रहरीले यसबारे अनुसन्धान भइरहेको बताएको छ । मृतकको शव परीक्षणका लागि जिल्ला अस्पताल लैजाने तयारी भइरहेको छ ।
