काठमाडौं / मलेसियाको सबाह राज्य नजिकै पर्ने सुलु सागरको समुद्री सतहमुनि सोमबार बिहान शक्तिशाली भूकम्प गएको छ । अमेरिकी भूगर्भ सर्वेक्षण (यूएसजीएस) का अनुसार स्थानीय समय अनुसार सोमबार बिहान १२ः५७ बजे ७.१ म्याग्निच्युडको भूकम्प मापन गरिएको हो ।
यो भूकम्प सन् १९२३ पछि यस क्षेत्रमा रेकर्ड गरिएका ठूला भूकम्पहरूमध्ये एक मानिएको छ । यद्यपि, भूकम्पको केन्द्रविन्दु जमिनको सतहभन्दा करिब ६२० किलोमिटर गहिराइमा रहेका कारण सम्भावित ठूलो संकट भने टरेको छ । भूगर्भविद्हरूका अनुसार सामान्यतया धेरै गहिराइमा केन्द्रविन्दु भएर जाने भूकम्पले जमिनको सतहमा कम प्रभाव पार्ने र सुनामीको लहर पैदा गर्ने सम्भावना न्यून हुन्छ ।
- ADVERTISEMENT -
भूकम्पलगत्तै प्रशान्त महासागरीय सुनामी चेतावनी केन्द्रले कुनै पनि सुनामीको खतरा नरहेको स्पष्ट पारेको छ । केन्द्रका अनुसार अत्यधिक गहिराइका कारण समुद्री छालहरूमा कुनै असामान्य हलचल देखिएको छैन । यस्तै , मलेसियाको मौसम विज्ञान विभागले पनि सुनामीको कुनै जोखिम नरहेको भन्दै सर्वसाधारणलाई नआतिएर आफ्नो नियमित कार्यमा लाग्न अपिल गरेको छ ।
भूकम्पको धक्का मलेसियाको सबाह र सारावाक क्षेत्रमा केही सेकेन्डसम्म महसुस गरिएको थियो । मध्यरातमा जमिन हल्लिएपछि त्रसित बनेका कतिपय स्थानीय बासिन्दाहरू घरबाहिर निस्किएका थिए । मलेसियाका अतिरिक्त छिमेकी मुलुकहरू फिलिपिन्स, ब्रुनाई र सिंगापुरका केही अग्ला भवनहरूमा समेत हल्का कम्पन महसुस गरिएको स्थानीय सञ्चारमाध्यमहरूले जनाएका छन् ।
- ADVERTISEMENT -
सबाहको वारुण नियन्त्रण तथा उद्धार विभागले हालसम्म भूकम्पका कारण कुनै पनि भौतिक पूर्वाधारमा क्षति पुगेको वा मानवीय हताहती भएको रिपोर्ट प्राप्त नभएको जानकारी दिएको छ । सुरक्षा अधिकारीहरूले सावधानीका लागि समुद्री किनार र जोखिमयुक्त मानिएका क्षेत्रहरूमा निगरानी बढाएका छन् । विशेषज्ञहरूले यसलाई ‘डिप फोकस’ भूकम्प भनेका छन् , जसको शक्ति गहिराइमै क्षय हुने भएकाले सतहमा विनासकारी प्रभाव कम परेको हो ।
