काठमाडौं । नेपाली महिला राष्ट्रिय फुटबल टिमकी कप्तान साबित्रा भण्डारी (साम्बा)ले उपचारका लागि साथ र सहयोग जुटाइदिने समर्थकप्रति आभार व्यक्त गरेकी छन् ।
हिजो मात्रै आर्थिक सहयोगको अपिल गरेकी उनले पछिल्लो २४ घण्टामा प्राप्त साथ, विश्वास र मायाप्रति कृतज्ञता व्यक्त गर्दै अब थप सहयोग रोक्न अनुरोध गरेकी हुन् ।
- ADVERTISEMENT -
साम्बाका अनुसार उनको उपचारका लागि नेपाली बैंक खातामा एक करोड रुपैयाँभन्दा बढी र विदेशी प्लेटफर्ममार्फत करिब ४५ लाख रुपैयाँ (५२ हजार न्युजिल्यान्ड डलर) संकलन भएको छ । विभिन्न संघ–संस्था तथा प्रायोजक संस्थाबाट नगद र सुविधा सहयोगको वाचा समेत प्राप्त भएको उनले उल्लेख गरेकी छन् ।
कतारमा उपचारका क्रममा लाग्ने आवास तथा यातायात खर्चसमेत जुट्ने देखिएकाले अब दुवै खातामा सहयोग रकम नपठाउन उनले अनुरोध गरेकी छन् ।
उनले आफू आबद्ध क्लबले शल्यक्रिया र पुनस्र्थापनाका लागि बीमा रकम निकासा गरी थप सहयोग गर्दै उपचार प्रक्रिया सहज बनाइरहेको जानकारी दिएकी छन् । छिट्टै शल्यक्रियाको मिति तय भएर प्रक्रिया अघि बढ्नेमा आफू विश्वस्त रहेको उनको भनाइ छ ।
चोटका कारण शारीरिकसँगै मानसिक रूपमा पनि थकान महसुस भएको उल्लेख गर्दै उनले समर्थकको साथले पुनः उठ्ने साहस दिएको बताएकी छन् । “खेलाडीका रूपमा मैले कमाएको सबैभन्दा ठूलो सम्पत्ति पैसा र उपाधि होइन, यो माया, भरोसा र समर्थन रहेछ भन्ने फेरि एकपटक महसुस गरेँ,” उनले लेखेकी छन् ।
दृढ संकल्प व्यक्त गर्दै साम्बाले पुनः नेपालको जर्सी लगाएर मैदानमा फर्कने प्रतिबद्धता दोहोर्याएकी छन् । “म फर्कनेछु, अझ मजबुत भएर फर्कनेछु। देशका लागि, तपाईंहरूका लागि, र त्यो विश्वासका लागि जसले मलाई अघि बढाएको छ,” उनले सन्देशमा उल्लेख गरेकी छन् ।
