काठमाडौँ / प्रतिनिधि सभाको सभामुख चयनको लागि चैत २२ गते निर्वाचन हुने भएको छ ।
बिहीबार बसेको प्रतिनिधि सभाको पहिलो बैठकमा सभाका ज्येष्ठ सदस्य अर्जुननरसिंह केसीले सभामुख निर्वाचनको लागि मिति तोतेका हुन् ।
- ADVERTISEMENT -
सदस्य केसीले सङ्घीय संसदको महासचिव पद्यप्रसाद पाण्डेलाई सभामुख पदको निर्वाचन कार्यक्रमसम्बन्धी सूचना बिहीबार नै प्रकाशन गर्न पनि निर्देशन दिएका छन् ।
सभाको पहिलो बैठक बसेको १५ दिनभित्र सभामुख र उपसभामुखको निर्वाचन गर्नुपर्ने प्रावधान रहेको छ । सोहीअनुसार जेष्ठ सदस्य केसीले सभामुख चयनको लागि निर्वाचनको मिति तोकेका हुन् ।
उनले भने ‘प्रतिनिधि सभा नियमावली २०७९ नियम ७ को उपनियम १ बमोजिम प्रतिनिधि सभा सभामुख पदको निर्वाचनको लागि २०८२ साल चैत महिना २२ गते आइतबारको दिन तोकेको छु । साथै उक्त नियमावली बमोजिम सङ्घीय संसदको महासचिव श्री पद्यप्रसाद पाण्डेलाई सभामुख पदको निर्वाचन कार्यक्रमसम्बन्धी सूचना आजै प्रकाशन गर्न पनि निर्देशन दिएको छु ।’
सभामुखको निर्वाचनपछि उपसभामुखको निर्वाचन हुनेछ ।
