भरतपुर / चितवनका विभिन्न मिडियामा आवद्ध पत्रकारहरुलाई दुई दिने ‘पत्रकारितामा एआईको प्रयोग’ सम्बन्धि तालिम दिइएको छ । आन्तरिक मामिला तथा कानुन मन्त्रालय बागमती प्रदेशको आयोजना एवम् नेपाल पत्रकार महासंघ बागमती प्रदेश र जिल्ला शाखा चितवनको सहकार्यमा बिहीबार ‘डिजिटल पत्रकारिता तथा पत्रकारितामा एआईको प्रयोग’ सम्बन्धी क्षमता अभिवृद्धि तालिम सम्पन्न गरिएको हो ।
तालिममा गोरखापत्र दैनिकका सह–सम्पादक तथा प्रशिक्षक अजय शर्माले पत्रकारका लागि डिजिटल साक्षरण र पत्रकारितामा एआईको प्रयोग सम्बन्धि प्रशिक्षण दिएका थिए । पत्रकारहरुले प्रविधिको विकाससँगै आफ्नो क्षमता विकास गर्नुपर्ने बताउँदै उनले एआई मार्फत समाचार लेखन, समाचारवाचन, फोटो÷भिडियो सामाग्री उत्पादन गर्ने तरिका सिकाए ।
- ADVERTISEMENT -
अर्का प्रशिक्षक राजन गौतमले सुरक्षित ‘सर्च इन्जिन’ र त्यसका प्रकार, एआईमा स्पष्ट निर्देशन दिने ‘प्रम्प्ट’ लगायतको विषयमा प्रशिक्षण दिएका थिए । बुधबार तालिमको उद्घाटन गर्दै जिल्ला समन्वय समिति चितवनका प्रमुख नारायणप्रसाद अधिकारीले पत्रकारलाई ज्ञान हासिल गर्ने अवसर प्रदान गरेकामा बागमती प्रदेश सरकारलाई धन्यवाद व्यक्त गरे ।
कार्यक्रममा नेपाल पत्रकार महासंघ बागमती प्रदेशका अध्यक्ष कृष्ण सारु मगर, महासचिव राधेश्याम खतिवडा, पत्रकार महासंघ चितवन शाखाका अध्यक्ष बसन्त पराजुली लगायत ५० बढी पत्रकारहरुको सहभागिता रहेको थियो ।
