चितवन / बागमती प्रदेश सरकारले चितवनको माडीमा छरिएर रहेका चेपाङ समुदायलाई एउटै स्थानमा एकीकृत बस्तीको अवधारणा अनुरुप ३९ वटा बनाउने भएको छ ।
यसै आर्थिक वर्षमा निर्माण सम्पन्न गर्ने तयारी गरेको सहरी विकास तथा भवन कार्यालय मकवानपुरका प्रमुख सी.डी.ई भुपेन्द्र यादवले जानकारी दिए । वर्षायाममा चुहिने, कच्ची बेराघेरा गरेर गुजारा गर्दै आएका उनीहरूका लागि प्रदेश सरकारले घर निर्माणको तयारी गरेको उनको भनाइ छ ।
- ADVERTISEMENT -
प्रदेशको चितवन र मकवानपुर जिल्लामा जनता आवास तथा चेपाङ वनकरिया, माझी, बोटे समुदायहरूका लागि २ वटा कार्यक्रम अन्तर्गत अवास निर्माणको काम गर्दै आएको उनले भने ।
प्रदेश सरकारले सीमान्तकृत चेपाङ, वनकरिया, माझी, बोटे लगायत एकल महिलाहरूका लागि आवासगृह निर्माण गर्दै आएको छ । उनका अनुसार सीमान्तकृत समुदायहरूको अझै पनि शिक्षा, स्वास्थ्यप्रतिको चेतनास्तर कमजोर रहेको र बाल विवाह, कुरीति, अन्धविश्वासमा जकेडिएकाले राज्यको मूल धारमा ल्याउन आवास विकास कार्यक्रम सञ्चालन गरिएको हो ।
- ADVERTISEMENT -
स्थानीय सरकारको सिफारिस र छनोटलाई मूल आधार बनाएर प्रदेश सरकारले आवास गृह निर्माणको प्रक्रिया अघि बढाउने गरेको यादवले बताए । हालसम्म ३८ करोड ४३ लाख रुपैया खर्च गरिसकेको प्रदेश सरकारले प्रतिघर परिवार ४ लाख रुपैयाँ उपलब्ध गराउने गरेको छ भने घरप्रतिको अपनत्वका लागि लाभग्राहीले श्रमदान समेत गर्ने गरेको उनले बताए ।
उनका अनुसार आर्थिक वर्ष २०७९÷०८० मा प्रदेश सरकारले मकवानपुरमा २७९ र चितवनमा २२४ वटा घर निर्माण सम्पन्न गरी हस्तान्तरण समेत गरिसकेको छ । यसका लागि प्रदेश सरकारले २० करोड १२ लाख रुपैयाँ खर्च गरेको छ भने चालु आर्थिक वर्ष ९४ वटा घर निर्माण भइरहेको छ । थप १०५ घर निर्माण सम्पन्न गर्ने लक्ष्य लिएको उनले बताए । हालसम्म आवास निर्माण बापत ३८ करोड ४३ लाख रुपैयाँ खर्च गरिसकेको उनको भनाइ छ ।
