चितवन / भरतपुर वडा नं. २ स्थित रामेश्वर टोल विकास संस्था तथा रामेश्वर मित्रमिलन समाजको संयुक्त आयोजनामा बुधबार खुल्ला रक्तदान कार्यक्रम सम्पन्न भएको छ ।
सामाजिक उत्तरदायित्व वहन गर्दै सम्पन्न भएको उक्त कार्यक्रममा महिला र पुरुषसहित ४१ जनाले रक्तदान गरेको रामेश्वर टोल विकास संस्थाका अध्यक्ष किशोर पाण्डेले जानकारी दिए ।
- ADVERTISEMENT -
भरतपुर महानगरपालिका वडा नं. २ का वडाअध्यक्ष मनोज रानाभाट कार्यक्रमका प्रमुख अतिथि रहेका थिए ।
कार्यक्रमको उद्घाटनपछि बोल्दै अध्यक्ष रानाभाटले रक्तदान जीवनदान भएकाले सबैलाई यस पुण्यकार्यमा जुट्न आग्रह गरे ।
पछिल्लो समय जिल्लामा रगतको चरम अभाव हुँदै गएकोले विभिन्न संघसंस्थालाई नेपाल रेडक्रस सोसाइटी चितवनले पनि विभिन्न संघसंस्थालाई रक्तदानको अपिल समेत गरेको छ ।
रगतको अभावलाई पूर्ति गर्ने उद्देश्यले गरिएको कार्यक्रमले “रक्तदान नै मानव इतिहासकै महान पुण्य कार्य हो” भन्ने सन्देश फैलाउने र सामाजिक भावना अभिवृद्धि हुने विश्वास गरिएको छ ।
रामेश्वर महादेव मन्दिर परिसरमा आयोजित उक्त कार्यक्रममा स्थानीय समाजसेवी, युवाहरू तथा विभिन्न क्षेत्रका व्यक्तिहरूको सहभागिता रहेको थियो ।
कार्यक्रम रामेश्वर टोल विकास संस्थाका अध्यक्ष किशोर पाण्डेको अध्यक्षता सम्पन्न भएको हो भने सचिव सुरज सापकोटाले सञ्चालन तथा समन्वय गरेका हुन् ।
