चितवन / लमजुङको मध्यनेपाल नगरपालिका–४, रम्घास्थित भानुघाँसी पार्कमा आदिकवि भानुभक्त आचार्य र घाँसी खड्कबहादुर ठाडामगरको सालिक तोडफोड गरिएको घटनाप्रति नेपाल आदिवासी जनजाति महासंघ, जिल्ला समन्वय परिषद चितवनको गम्भीर ध्यानाकर्षण भएको छ ।
आइतबार महासंघका अध्यक्ष सागर कुमाल र सचिव मिलन थापा मगरद्वारा हस्ताक्षरित विज्ञप्ति जारी गर्दै गत साउन ७ गते अज्ञात समूह वा व्यक्तिद्वारा गरिएको उक्त तोडफोडको घोर भर्त्सना गरिएको हो ।
- ADVERTISEMENT -
महासंघले यो घटना केवल दुई व्यक्तिको सालिकमाथिको आक्रमण मात्र नभई नेपालको साझा इतिहास, साहित्य, संस्कृति, राष्ट्रिय सम्पदा तथा सामाजिक सद्भावमाथिकै प्रहार भएको ठहर गरेको छ । नेपाली समाजमा भाषा, साहित्य, श्रम र समानताको सन्देश प्रवाह गर्ने महान् व्यक्तित्वहरूमाथि गरिएको यस्तो अमानवीय र गैरजिम्मेवार कार्य कुनै पनि सभ्य समाजका लागि स्वीकार्य हुन नसक्ने विज्ञप्तिमा उल्लेख छ ।
विज्ञप्तिमा भनिएको छ, ‘विशेषगरी श्रमको सम्मान, आत्मनिर्भरता र सामाजिक प्रेरणाका प्रतीकका रूपमा चिनिने घाँसी खड्कबहादुर ठाडामगरको योगदान तथा आदिकवि भानुभक्त आचार्यको नेपाली भाषा(साहित्यमा रहेको अतुलनीय योगदानप्रति गरिएको यस्तो अनादरले सम्पूर्ण नागरिकलाई दुःखी र चिन्तित बनाएको छ ।’
महासंघले नेपाल सरकार, गृह प्रशासन तथा सम्बन्धित सुरक्षा निकायसँग घटनाको तत्काल निष्पक्ष र गहिरो अनुसन्धान गरी दोषीहरूलाई कानुन बमोजिम कडा कारबाही साथै, क्षतिग्रस्त सालिकहरूको यथाशीघ्र पुनःस्थापना गर्न र यस्ता ऐतिहासिक, सांस्कृतिक तथा सार्वजनिक सम्पदाको प्रभावकारी सुरक्षा व्यवस्था मिलाउन जोडदार माग गरेको छ ।
यसैगरी, सम्पूर्ण नागरिक, सामाजिक संघ–संस्था तथा सरोकारवालाहरूलाई राष्ट्रिय सम्पदा, ऐतिहासिक स्मारक र सांस्कृतिक धरोहरको संरक्षणमा एकजुट हुनका साथै सामाजिक सद्भाव, आपसी सम्मान र सहिष्णुताको वातावरण कायम राख्न महासंघले हार्दिक अपिल गरेको छ ।
