चितवन / जिल्ला प्रशासन कार्यालय चितवनले अविरल वर्षाका कारण बाढी, पहिरो तथा डुबानको जोखिम बढेपछि नारायणगढ–मुग्लिन सडकखण्डमा आज रातिदेखि रात्रिकालीन सवारी आवागमन पूर्ण रूपमा बन्द गर्ने निर्णय गरेको छ ।
जिल्ला प्रशासन कार्यालयका अनुसार राति ८ बजेदेखि भोलि बिहान ५ बजेसम्म उक्त सडकखण्डमा सबै प्रकारका सवारीसाधनको आवागमनमा रोक लगाइएको हो ।
- ADVERTISEMENT -
जल तथा मौसम विज्ञान विभागले चितवनलगायत आसपासका क्षेत्रमा निरन्तर वर्षा भइरहेको र आगामी केही दिनसम्म भारीदेखि अति भारी वर्षा हुन सक्ने पूर्वानुमान जारी गरेपछि यात्रु तथा सवारीसाधनको सुरक्षालाई ध्यानमा राख्दै प्रशासनले यस्तो निर्णय गरेको जनाएको छ ।
सहायक प्रमुख जिल्ला अधिकारी ईश्वरी प्रसाद शर्माले हस्ताक्षर गरेको सूचनामा मौसम तथा सडकको वर्तमान अवस्था बुझेर मात्रै यात्रा गर्न यात्रु तथा सवारी चालकलाई आग्रह गरिएको छ ।
- ADVERTISEMENT -
वर्षाका कारण सडकखण्डमा पहिरो तथा अन्य प्राकृतिक जोखिम उत्पन्न हुन सक्ने भएकाले प्रशासनले यात्रुहरूलाई अनावश्यक रूपमा रातिको समयमा यात्रा नगर्नसमेत आग्रह गरेको छ ।
