नेपालमा ५३३५ संक्रमित, थप दुईसहित १८ जनाको मृत्यु

काठमाडौँ । नेपालमा शनिबार थप २७३ जनामा कोरोना संक्रमण पुष्टि भएको छ । नियमित पत्रकार सम्मेलनमा थप २७३ जना कोरोना संक्रमित देखिएको स्वास्थ्य तथा जनसंख्या मन्त्रालयले जनाएको छ ।
योसँगै नेपालमा कोरोना संक्रमितको संख्या ५ हजार ३३५ पुगेको छ । मन्त्रालयका प्रवक्ता डा.जागेश्वर गौतमका अनुसार शनिबार मात्र २६ जना डिस्चार्ज भएका छन् । थप २६ जनासहित हालसम्म ९ सय १३ जना निको भएर घर फर्किएका छन् । शनिबारसम्म संक्रमित पुष्टि भएका जिल्लाको संख्या ७२ पुगेको छ ।
यसैगरी नेपालमा पछिल्लो २४ घण्टामा थप २ जनाको कोरोना संक्रमणबाट मृत्यु भएको डा गौतमले बताए । थप २ सहित नेपालमा कोरोनाबाट ज्यान गुमाउनेको संख्या १८ पुगेको छ ।
डा. गौतमले ज्यान गुमाउनेमा बारा निजगढ ६ का ५ बर्षीय बालक र पर्सा वीरगञ्जको घण्टाघरस्थित चौरमा वेवारिसे अवस्थामा भेटिएको अन्दाजी २५ बर्षीय पुरुष रहेको बताए । ५ बर्षीय बालकको शुक्रबार वीरगञ्जस्थित हेल्थकियर सेन्टरमा उपचारका क्रममा मृत्यु भएको थियो । उच्च ज्वरोका कारण वीरगन्ज हेल्थ केयर अस्पतालमा भर्ना गरिएको थियो । कोरोना पोजिटिभ रिपोर्ट नआउँदै उनको निधन भइसकेको थियो ।
वीरगञ्जको घण्टाघरस्थित चौरमा वेवारिसे अवस्थामा भेटिएको पुरुषको भने २८ गते मृत्यु भएको थियो । जेठ २८ गते शव भेटिएपछि उनको स्वाब परीक्षण नारायणी अस्पतालमा लगिएको थियो । वीरगञ्जस्थित प्रयोगशालाबाट शनिबार बिहान आएको पीसीआर रिपोर्टमा दुबै जनामा कोराना पोजेटिभ देखिएको हो ।