दुर्घटनामा एकको मृत्यु, बुलेट चालक फरार

0
31

चितवन । चितवनको नारायणगढ–मुग्लिन सडक खण्ड अन्तरगत भरतपुर–१९ स्थित सत्र किलोमा भएको सवारी दुर्घटनामा हेटौंडाकी एक महिलाको मृत्यु भएको छ । सोमबार साँझ ५ः५० बजेको समयमा नारायणगढ–मुग्लिन सडक खण्ड अन्तरगत भरतपुर–१९ स्थित सत्र किलोमा उक्त दुर्घटना भएको जिल्ला प्रहरी कार्यालय चितवनले जनाएको छ ।
मुग्लिनबाट नारायणगढतर्फ आइरहेको बा१३च ५९२९ नम्बरको स्कार्पियो र बिपरित दिसाबाट गइरहेको ग्यास बुलेट एक आपसमा ठक्कर खाँदा उक्त दुर्घटना भएको हो । दुर्घटनामा स्कार्पियोमा सवार ५ जना नै घाइते भएको प्रहरीले जनाएको छ ।
घाइतेहरुलाई उपचारका लागि भरतपुर ल्याउँदै गर्दा मकवानपुर हेटौडा उपमहानगरपालिका–५ बस्ने वर्ष ४८ की प्रभा गौतमको बाटोमा नै मृत्यु भएको जिल्ला प्रहरी कार्यालय चितवनले जानकारी दिएको छ ।
दुर्घटनामा सोही स्थान बस्ने वर्ष ५३ का कृष्ण धिताल, वर्ष २७ की वर्षा धिताल, वर्ष ४५ का राजन घिमिरे, वर्ष २५ का अनुज धिताल घाइते भएका छन् । सवारी दुर्घटनापछि ग्याँस बुलेटका चालक फरार भएका छन् ।