विकासका लागि प्राथमिकताकासाथ बजेट विनियोजन : मन्त्री लामा

भण्डारा / बागमती प्रदेश सरकारका भूमि व्यवस्था तथा कृषि सहकारी मन्त्री दावा दोर्जे लामाले प्राविधिक त्रुटीका कारण केही ठाउँमा बजेट नपरेको बताए । पूर्वी चितवन राप्ती नगरपालिका वडा नं ५ शिखर बस्तीमा अवस्थित शिखर सामुदायिक विकास केन्द्रको भवन समुदघाटन कार्यक्रममा मन्त्री लामाले प्राविधिक त्रुटीका कारण केही ठाउँमा बजेट नपरेको बताएको हो ।
मन्त्री लामाले जनतासामू गरेको वाचा अनुरुप सबै क्षेत्रमा बजेट विनियोजन भइरहेको र छुटेको ठाउँमा पनि प्राथमिकताका साथ बजेट विनियिोजन गरिने उनको भनाइ थियो ।
बागमती प्रदेश सरकारले आर्थिक वर्ष २०७७/०७८ का लागि शिखर सामुदायिक विकास केन्द्रलाई १५ लाख बजेट विनियोजन गरेको हो । मन्त्री लामाले रिवन काटी ताम्रपत्र वाचन गरेर भवनको उद्घाटन गरेका हुन् ।
कार्यक्रममा विभिन्न सामाजिक संघ संस्थाबाट आआफ्नै ज्ञापन पत्र समेत लामालाई बुझाएका थिए । विभिन्न संघसंस्थाका पदाधिकारीहरु र सामाजिक व्यक्तित्वहरुको उल्लेख्य उपस्थिति थियो ।
कार्यक्रम सामुदायिक विकास केन्द्रका उपाध्यक्ष चमेली थिङको सभापतित्वमा सम्पन्न भएको थियो भने सचिव गोमनसिंह रुम्बाले कार्यक्रम संचालन र विशेश्वर लामाले स्वागत मन्तव्य दिनु भएको थियो ।