म्यूजिक भिडियो ‘माया मोहनी’को युट्युबमार्फत सार्वजनिक

चितवन । म्यूजिक भिडियो ‘माया मोहनी’को युट्युबमार्फत आज शुक्रबार सार्वजनिक हुँदैछ । उक्त भिडियोको कमलनगरस्थित होटल हेप्पी होममा बिहीबार पत्रकार सम्मेलनमार्फत गायक तथा संगीतकार मनोज महतोले जानकारी दिए ।
गायक एवं संगीतकार महतो स्वयम्को कम्पोज रहेको सो भिडियोमा अहिलेका चर्चित कलाकार पुष्प खड्का र नवकलाकार गीता ढुंगानाले अभिनय गरेका छन् भने नवगायक मुनाल महतो र अनु चौधरीको स्वर रहेको छ । म्यूजिक भिडियोको शब्द रचना सुवेश कठरियालेको हो ।
भिडियोमा कैलालीको थारु गाउँ र काठमाडौँका विभिन्न स्थानमा छायाङ्कन गरिएको निर्माण समूहले बताएको छ । सुरज कुसुम्याले निर्देशन गरेको सो भिडियो नवगायक मुनालको पहिलो गीत भएको गायक तथा संगीतकार मनोजले बताए । दर्शक तथा स्रोताले मन पराउनेमा ढुक्क रहेको उनको भनाइ छ ।
ज्ञानेन्द्र शर्माले खिचेको भिडियोमा गायक मुनालका बुबा कुमनारायण महतोले लगानी गरेका हुन् भने भिडियोको सम्पादन रामु चौधरीले गरेका हुन् ।
पछिल्लो समय थारु भाषाका गीत–संगीत निकै फस्टाएको छ । त्यसकारण तराई क्षेत्रमा बसोवास गर्ने थारु समुदायको रहनसहन र संस्कार तथा संस्कृतिमा आधारित गीत–संगीत, चलचित्र तथा म्युजिक भिडियो बन्ने क्रम पनि तीव्र बन्दै गइरहेका छन् ।
थारु भाषाकै गीत–संगीतबाट आफूलाई गायक तथा संगीतकारको रुपमा परिचय दिन सफल मनोज महतोले पछिल्लो समय भाषिक तथा भेगीय संगीत रूचाउन थालेको बताए ।