तत्काल मन्त्री मण्डल बिस्तार नहुने : नेता बस्नेत

0
15

चितवन / नेकपा (एमाले) का नेता तथा पूर्व मन्त्री महेश बस्नेतले तत्काल मन्त्री मण्डल बिस्तार नहुने बताए । माओवादीभित्र मन्त्री बन्न सबैजसो सांसदले इच्छा व्यक्त गरेको र मन्त्री बन्ने लोभले समाजवादीमा गएकाहरु सबै मन्त्री बन्ने पर्खाईमा रहेको उनले संकेत गरे ।
माओवादी भित्र मन्त्री बन्न नपाएकाहरु बिद्रोहमा उत्रने उनले बताए । यस्तै उता समाजवादीमा पनि मन्त्री खान गएकाहरु मन्त्री नपाएपछि एमाले मै फर्कने दावी गरे ।
प्रेस चौतारी नेपाल चितवन शाखाले शनिबार भरतपुरमा आयोजना गरेको पत्रकार भेटघाट कार्यक्रममा बोल्दै युवा नेता बस्नेतले एमसीसीमा एमालेको स्पष्ट धारणा रहेको भन्दै सरकारले भने धारणा स्पष्ट पार्न नसकेको आरोप लगाए ।
जनभावना अनुसार समय आएपछि एमालेले स्पष्ट रूपमा धारणा सार्वजनिक गर्ने समेत उनले बताए । बस्नेतले सभामुखको निस्पक्षतामा प्रश्न उठेको र संसदीय मूल्य र मान्यता विपरित पार्टी–पार्टी बीच विभेद गरेको उनले जानकारी दिए ।
संसद अवरुद्ध हुनु एमालेको कारण नभई सभामुखकै कारण भएको बस्नेतले आरोप लगाए ।
कार्यक्रममा चितवनका सांसद तथा कानुन न्याय तथा संसदीय समितिका सभापति कृष्णभक्त पोख्रेलले कानुनी मूल्य र मान्यता अनुसार सभामुख चल्न नसकेको बताए ।