बागमतीको मुख्यमन्त्रीमा इन्द्र कि राजेन्द्र !

मकवानपुर / बागमती प्रदेशसभाको बैठक आज बस्दैछ । बैठकमा मुख्यमन्त्री अष्टलक्ष्मी शाक्य बोहराले विश्वासको मत लिने कार्यसूचि तय भएको छ । शाक्यले गएको असोज २४ गते बसेको प्रदेशसभा बैठकमा नेपालको संविधानको धारा १८८ को उपधारा २ तथा प्रदेश नियमावली २०७४ को नियम १४३ को उपनियम १ बमोजिम विश्वासको मतसम्बन्धी प्रस्ताव पेस गरेकी थिइन् ।
सो प्रस्तावमाथि आज बस्ने बैठकमा छलफल हुने र विश्वासको मत लिने प्रकृया अगाडि बढाइने प्रदेशसभा सचिवालयका प्रमुख सचिव कृष्णहरि खड्काले जानकारी दिएका छन् । भदौ २ गते नेकपा एमालेको एकल बहुमतबाट मुख्यमन्त्री नियुक्त भएकी शाक्य अहिले अल्पमतमा छिन् । एमालेका १३ सांसदले नेकपा एकीकृत समाजवादी रोजेपछि मुख्यमन्त्री एमाले ५६ सांसदबाट ४३ सांसदमा खुम्चिन पुगेको छ ।
सत्ता गठबन्धनको साथ नपाउँदा मुख्यमन्त्री शाक्यले अन्य स–साना दलको साथ पाए पनि उनले विश्वासको मत पाउने संभावना रहँदैन । अर्थात् उनको नेतृत्वमा सरकार टिक्ने देखिँदैन ।
अब, बागमती प्रदेशमा सत्ता गठबन्धनको नेतृत्वमा सरकार बन्ने देखिएको छ । बागमतीमा सरकारको नेतृत्व कुन दलले गर्ला भन्ने विषयलाई चासोको रुपमा हेरिएको छ । कांग्रेसको तर्फबाट इन्द्र बानिया र नेकपा समाजवादीबाट राजेन्द्र पाण्डे मुख्यमन्त्री बन्ने रेसमा छन् ।
बैठक सार्न एमालेको पत्र
आज कात्तिक ४ गते बस्ने प्रदेशसभाको बैठक सार्न नेकपा एमालेले प्रदेशसभा सचिवालयलाई आग्रह गरिएको छ । लिखित पत्र पठाउँदै एमालेले आज हुने प्रदेशसभाको बैठक सार्न सचिवालयलाई आग्रह गरेको हो । बैठक ११ गतेका लागि बोलाउन एमालेले लिखित प्रस्ताव गरेको छ ।
कात्तिक पहिलो हप्ताभित्र नेकपा एमालेको स्थानीय अधिवेशन हुने र सो अधिवेशनका कारण एमालेबाट प्रतिनिधित्व गर्ने प्रदेशसभा सदस्यहरु बैठकमा उपस्थित हुन नसक्ने कारण देखाउँदै बैठक ११ गते सार्न सो दलका प्रमुख सचेतक दीपक निरौलाले प्रदेशसभा समक्ष लिखित प्रस्ताव गरेका हुन् । मुख्यमन्त्री शाक्यको आज हुने विश्वासको मत टार्नको लागि नेकपा एमालेले बैठक सार्ने प्रस्ताव गरेको हो ।