चितवन २ सहित तीन स्थानमा मतदान जारी

चितवन / प्रतिनिधिसभातर्फ रिक्त रहेको तीन क्षेत्रमा (चितवन २, बारा २ र तनहुँ १) मतदान सुरु भएको छ । मतदान गर्नका लागि मतदाताहरु बिहानैदेखि मतदान स्थलमा पुगेर लामबद्ध भएका छन् ।
निर्वाचन आयोगले बिहान ७ बजेदेखि साँझ ५ बजेसम्म मतदानको कार्यतालिका तोकेको छ । निर्वाचन हुने तीन वटै क्षेत्रमा सार्वजनिक बिदा दिइएको छ ।
चितवन २ मा ४३ वटा मतदान स्थल र १३८ वटा मतदान केन्द्र रहेका छन् । यस क्षेत्रमा भरतपुर महानगरका १० वटा वडा, कालिका नगरपालिका र इच्छाकामना गाउँपालिकाका गरी एक लाख २४ हजार ६९५ मतदाता रहेका छन् ।
गत संसदीय निर्वाचनमा चितवनबाट निर्वाचित राष्ट्रिय स्वतन्त्र पार्टीका सभापति रवि लामिछानेको नागरिकता मुद्दामा अदालतले फैसला गरेपछि रिक्त सो क्षेत्रमा अहिले निर्वाचन हुँदैछ ।
यस्तै, तनहुँबाट निर्वाचित रामचन्द्र पौडेल राष्ट्रपति निर्वाचित भएसँगै उक्त क्षेत्र र बाराबाट निर्वाचित रामसहाय यादव उपराष्ट्रपति बनेपछि उक्त क्षेत्रमा पनि उपनिर्वाचन भइरहेको छ ।