उपनिर्वाचन : नयाँकिरण माविमा तनाव, सेनाको टोलीद्वारा सुरक्षा

चितवन / उपनिर्वाचन स्थल रहेको भरतपुर–११ स्थित भोजाडस्थित नयाँकिरण माविमा केहीबेर तनाव सिर्जना भएको छ । तनावपछि केहीबेर मतदान कार्यक्रम नै बिथोलिएको हो ।
मतदान स्थलमा चितवन–२ का उपनिर्वाचन उम्मेदवार रवि लामिछाने प्रवेश गर्ने क्रममा उनका समर्थकहरूले नाराबाजी गरेपछि तनाव सिर्जना भएको हो । राष्ट्रिय स्वतन्त्र पार्टीका सभापतिसमेत रहेका उम्मेदवार लामिछाने मतदानस्थलमा पुगेपछि उनका समर्थकहरूले नाराबाजी गरेका थिए ।
विपक्षी पार्टीका समर्थकले प्रतिवाद गर्दा अवस्था तनावग्रस्त भएको हो । अवस्था तनावग्रस्त भएपछि प्रहरीले लाठीचार्जसमेत गरेको थियो । अहिले मतदानस्थल बाहिर नेपाली सेनाको टोलीले सुरक्षा दिइरहेको छ भने मतदान कार्यक्रम चलिरहेको छ ।
यस क्षेत्रमा लोकतान्त्रिक–वाम गठबन्धनबाट नेपाली कांग्रेसका जीतनारायण श्रेष्ठ, नेकपा एमालेबाट रामप्रसाद न्यौपाने र रास्वपाका लामिछाने मुख्य उम्मेदवार रहेका छन् । उनीहरूसँगै २२ उम्मेदवार चुनावी मैदानमा छन् ।
चितवन निर्वाचन क्षेत्र नम्बर –२ मा एक लाख २४ हजार ६९५ मतदाता कायम भएका छन् । जहाँ मंसिर ४ मा निर्वाचन हुँदाको भन्दा ४८० मतदाता थपिएका छन् ।
इच्छाकामना गाउँपालिका र कालिका नगरपालिकासहित चितवन–२ मा भरतपुर महानगरपालिकाका २९ मध्ये १० वटा वडाहरू पर्दछन् । चितवन–२ मा दलबाट १२ र स्वतन्त्र १० गरी कुल २२ उम्मेदवार चुनावी मैदानमा छन् । चितवनमा मतदान स्थल ४३ र मतदान केन्द्र १३८ रहेका छन् ।