चितवन / भरतपुर अस्पतालमा राष्ट्रिय मानसिक स्वास्थ्य केन्द्र स्थापना गरिने भएको छ । मानसिक रोगको उपचारसगैँ पुनस्र्थापनासहित जनचेतना बढाउने उद्देश्यले केन्द्र निर्माण गर्न लागिएको अस्पताल जनाएको छ ।
नेपाल ईन्टूच्यूट अफ मेन्टल हेल्थको सहकार्यमा अस्पतालले सो केन्द्र स्थापना गर्न लागेको हो । संयुक्त राज्य अमेरिकामा रहेका मानसिक स्वास्थ्य क्षेत्रका चिकित्सक, परामर्शदाता र जनस्वास्थ्य विज्ञहरुको संस्था नेपाल ईन्स्टिच्यूट अफ मेन्टल हेल्थले केन्द्र निर्माणका लागि ५० प्रतिशत लगानी गर्ने सम्झौता पत्रमा सोमवार हस्ताक्षर गरिएको छ ।
- ADVERTISEMENT -
अस्पतालका अध्यक्ष राजु पौडेलले केन्द्र स्थापनाका लागि तत्काल ५ करोड रुपियाँ खर्च लाग्ने र सो रकम मध्ये ईन्स्टिच्यूटले आधा रकम लगानी गर्ने सम्झौता भएको जानकारी दिए ।
‘ईन्स्टिच्यूटसगै भरतपुर अस्पतालले पनि लगानीको २५ प्रतिशत र बाँकी २५ प्रतिशत विभिन्न दाताहरुसँग सहयोग जुटाउने गरि केन्द्र बनाउन लागेका छौँ । यो हामी डेढदेखि दुई वर्षभित्रमा सञ्चालनमा ल्याउने छौँ’, उनले भने ।
सम्झौतामा अस्पतालका तर्फबाट अध्यक्ष राजु पौडेल र मेडिकल सुपरिटेण्डेन्ट प्राडा कृष्णप्रसाद पौडेलले र “ईन्टूच्यूटका तर्फवाट कार्यकारी निर्देशक डा श्रीधर पौडेल र सदस्य डा खगेन्द्र काफ्लेले हस्ताक्षर गरेका छन् ।
नेपाल ईन्स्टिच्यूट अफ मेन्टल हेल्थका कार्यकारी निर्देशक श्रीधर पौडेलले नेपालमा मानसिक स्वास्थका क्षेत्रमा केही गर्ने उद्देश्यले आफूहरुले केन्द्र बनाउन लागिएको बताए ।
“नेपालमा मानसिक स्वास्थ्यलाई त्यति प्राथमिकतामा नदेखिएको अवस्थामा हामीले यो काम अगाडि बढायौ“, उनले भने, “नेपालमा मानसिक स्वास्थ्यको समस्या जटिल छ । यसलाई केन्द्रमा राखेर उपचार गर्ने देखि पूर्नस्थापना गर्ने सम्मको काम हामी गर्ने छौँ ।”
केन्द्रले समुदायमा जनचेतना जगाउने पनि बताए । मेडिकल सिटीका रुपमा विकास हुँदै गएको चितवनमा मानसिक रोगको उपचारमा केन्द्र स्थापना गर्नु आफैमा उपलब्धि हुने पनि उनको भनाइ थियो ।
अस्पतालका मेडिकल सुपरिटेण्डेन्ट प्राडा कृष्णप्रसाद पौडेलले मध्य नेपालमै सवै भन्दा बढी विरामीले उपचार गराई रहेका भरतपुर अस्पतालमा छुट्टै मानसिक स्वास्थ्य उपचार केन्द्र आवश्यक रहेको बताए ।
“मानसिक स्वास्थ्य समस्यामा परेका विरामीलाई अहिले सम्म विभागवाट सञ्चालन गरिएको थियो अब केन्द्र मार्फत सञ्चालन गरिने छ“ , उनले भने ।
भरतपुर अस्पतालमा अहिले ट्रमा सेन्टर र स्पाईनल सेन्टर पनि छुट्टै केन्द्रका रुपमा विकास हुँदै गएको छ ।
