– बबिलाल तामाङ
भरतपुर । प्रदेश सूचना पुनरावेदन समिति बागमती प्रदेशको आयोजनामा सूचनाको हक प्रवर्द्धनसम्बन्धी अन्तर्क्रिया कार्यक्रम सोमबार भरतपुरमा सम्पन्न गरिएको छ ।
भरतपुर महानगरपालिकाअन्तर्गत रहेका वडा तथा विभिन्न टोल विकास संस्थालाई लक्षित गरी सूचनाको हक प्रवर्द्धनसम्बन्धी अन्तर्क्रिया गरिएको प्रदेश सूचना पुनरावेदन समितिका अध्यक्ष हरिप्रसाद अधिकारीले जानकारी दिए ।
- ADVERTISEMENT -
देशका सात प्रदेशमध्ये बागमती प्रदेशमा नै पहिलो पटक बनेको यस समितिले हरेक नागरिकले सूचना पाउनुपर्ने अधिकार सुनिश्चित गर्ने उनको भनाइ थियो । कुनै कार्यालय, वडा तथा कसैले पनि सूचना लुकाए वा नदिए समितिमा जानकारी गराउन उनले आग्रह गरे ।
कार्यक्रमका प्रमुख अतिथि बागमती प्रदेशका आन्तरिक मामिला तथा कानुनमन्त्री शिवराज अधिकारीले जनताको सूचना पाउने अधिकारलाई कुण्ठित गर्न नहुने बताए । आम नागरिकलाई सूचनाको हक पाउने अधिकार सबैलाई उत्तिकै भएको उनले बताए ।
कार्यक्रममा आन्तरिक मामिला तथा कानुन मन्त्रालयका उपसचिव भुवन न्यौपाने र प्रदेश सूचना पुनरावेदन समितिका अध्यक्ष हरिप्रसाद अधिकारीले सूचनासम्बन्धी हकको विषयक प्रस्तुति दिएका थिए ।
कार्यक्रममा जिल्ला समन्वय समिति चितवनका प्रमुख नारायणप्रसाद अधिकारी, उपप्रमुख कल्पना काफ्ले, भरतपुर महानगरपालिका कार्यवाहक मेयर चित्रसेन अधिकारीलगायतले मन्तव्य दिएका थिए ।
कार्यक्रममा विभिन्न वडाका वडाध्यक्ष, टोल विकासका अध्यक्ष, शिक्षक, मानवअधिकार सम्बद्ध संस्थाका प्रमुख तथा प्रतिनिधिलगायत एक सय बढीको उपस्थिति रहेको थियो ।
प्रदेश सूचना पुनरावेदन समितिका सदस्य कृष्णबहादुर सारुमगरले कार्यक्रमको उद्देश्यबारे प्रकाश पार्दै स्वागत मन्तव्य दिएका थिए । कार्यक्रम अध्यक्ष हरिप्रसाद अधिकारीको सभापतित्वमा सम्पन्न भएको थियो ।
यसअघि हेटौँडा, सिन्धुपाल्चोक, सौराहा लगायतका क्षेत्रमा सूचनाको हक प्रवर्द्धनसम्बन्धी अन्तक्रिया गरिएको थियो । सहभागीहरुले कार्यक्रम उपलब्धिमूलक रहेका बताएका छन् ।
https://www.facebook.com/share/v/18izDGqDPX/?mibextid=wwXIfr
