काठमाडौं / नेपाल पत्रकार महासंघले जनआस्था साप्ताहिकका सम्पादक तथा आस्था मिडियाका अध्यक्ष किशोर श्रेष्ठको पक्राउको विरोधमा जिल्ला प्रहरी परिसर काठमाडौंअगाडि धर्ना दिएको छ ।
महासंघको नेतृत्वमा पत्रकारहरूले बिहीबार काठमाडौं प्रहरी परिसरअगाडि धर्ना दिँदै श्रेष्ठको तत्काल रिहाइको माग गरेका हुन् ।
- ADVERTISEMENT -
प्रहरीले पत्रकार श्रेष्ठलाई बुधबार राति ललितपुरको नख्खुस्थित आफ्नै निवासबाट पक्राउ गरी काठमाडौं प्रहरी परिसरको हिरासतमा राखेको छ ।
श्रेष्ठको पक्राउको विरोधमा धर्नामा सहभागी पत्रकारहरूले परिसरअगाडि नाराबाजीसमेत गरेका थिए । उनीहरूले ‘पत्रकार तर्साएर प्रेसको मुख थुन्ने प्रयास असम्भव’, ‘प्रेस स्वतन्त्रता पुनर्बहाली गर’ र ‘पत्रकार किशोर श्रेष्ठलाई विनाशर्त रिहाइ गर’ लगायतका नारा लेखिएका प्लेकार्ड बोकेका थिए ।
समाचार प्रकाशनको विषयलाई लिएर सम्पादकलाई पक्राउ गर्नु प्रेस स्वतन्त्रतामाथिको हस्तक्षेप भएको महासंघले जनाएको छ ।
समाचारमा चित्त नबुझे कानुनी तथा प्रेससम्बन्धी स्थापित प्रक्रियाबाट समाधान खोज्न महासंघले आग्रह गरेको छ । पत्रकारलाई नै पक्राउ गरेर हिरासतमा राख्ने कार्य स्वीकार्य नहुने महासंघको भनाइ छ ।
महासंघले पत्रकारहरूले निर्भीक रूपमा समाचार लेख्न तथा प्रकाशित गर्न सक्ने वातावरण बनाउन सम्बन्धित निकायसँग माग गरेको छ ।
महासंघले प्रेस तथा अभिव्यक्ति स्वतन्त्रताको संरक्षणका लागि पत्रकारमाथि हुने कुनै पनि प्रकारको हस्तक्षेप स्वीकार्य नहुनेसमेत स्पष्ट पारेको छ ।
