महेन्द्रनगर / कञ्चनपुरको शुक्लाफाँटा नगरपालिका–२ मा गए राति (मंगलबार) जङ्गली हात्तीको आक्रमणबाट एक वृद्धाको मृत्यु भएको छ ।
इलाका प्रहरी कार्यालय झलारीका अनुसार जङ्गली हात्तीको आक्रमणमा परी शुक्लाफाँटा–२ की ६० वर्षीया लक्ष्मी डगौंराको घटनास्थलमै मृत्यु भएको हो । शुक्लाफाँटा राष्ट्रिय निकुञ्जभित्र पर्ने तारापुर शिविरमा राति जङ्गली हात्तीको बथान पसेको थियो ।
हात्तीको बथानले डगौंराको घर भत्काउनुका साथै कुल्चिएर उनको ज्यान गएको रानीपुरका स्थानीय छलिलाल डगौंराले बताए ।
उनका अनुसार घरमा लक्ष्मी र उनका श्रीमान् मोहन डगौंरा सुतिरहेका बेला हात्तीको बथान आक्रमण गर्न पुगेको थियो ।
- ADVERTISEMENT -
मोहन भागेर ज्यान जोगाउन सफल भएका छन् । अहिले नेपाली सेना, नेपाल प्रहरी र निकुञ्ज प्रशासनको टोली घटनास्थलमा पुगेको छ ।
