नयाँ किरण माविको खाना महोत्सव र भेषभूषा प्रदर्शन

भरतपुर । भरतपुर–११ भोजाडमा अवस्थित नयाँ किरण माध्यमिक विद्यालय भोजाडका विद्यार्थीहरुले खाना महोत्सव सम्पन्न गरेको छ । विद्यालय अन्तर्गतका युवा रेडक्रस सर्कलका विद्यार्थीहरुले बुधबार खाना महोत्सव आयोजना गरेको थियो ।
विद्यालयका प्रधानाध्यापक रामेश्वर अधिकारीका अनुसार विद्यार्थीहरुलाई खाना महोत्सव गर्दा उनीहरुले दैनिक व्यवहार भए गरेका कामकाजको ज्ञान हुने भएकोले खाना महोत्सव राखिएको बताए । आजकल विद्यार्थीहरुलाई घरको कामकाजको ज्ञान काम हुँदै गएको र उक्त महोत्सवले थोरै भएपनि उनीहरुलाई सामान्य खाना कसरी पकाउनेमा ध्यान जाओस् भन्ने उद्देश्यले आयोजना गरिएको प्रधानाध्यापक अधिकारीले बताए ।
उक्त महोत्सवमा फरक फरक परिकारहरुका जम्मा आठ वटा स्टल राखिएको थियो । उक्त स्टलहरुमा मःम, पकौडा, चना÷अण्डा, आलु चप, साँधेको गुन्दु्रकको अचार, चिउरा फ्राई, चिया÷कफी, सेवाईलगायतका खानाका परिकार बनाइएको विद्यालयका शिक्षिका प्रिती तामाङले बताइन् । शिक्षिका तामाङका अनुसार महोत्सवमा उत्कृष्ट हुनेहरुलाई विद्यालयले पुरस्कारको व्यवस्था गरेको बताइन् ।
उक्त अवसरमा गुरूङ, मगर, तामाङ, कुमाल, नेवार, मुस्लिमलगायतका समुदायको भेषभूषा प्रदर्शन गरिएको थियो । विभिन्न जातजातिको पहिचान झल्किने गरी १० समूहले भेषभूषा प्रदर्शन गरेका थिए ।
उक्त महोत्सव कार्यक्रममा विद्यालय व्यवस्थापन समितिका अध्यक्ष रके पाण्डे, भरतपुर ११ का वडा अध्यक्ष बाबुराम अधिकारी, विद्यालयका चन्दादाता कमल मल्ललगायतले शुभकामना मन्तव्य दिएका थिए ।