प्रहरीको नियन्त्रणमा अवैध भारतीय केरा

भरतपुर । भरतपुर महानगरपालिका वडा नम्बर ४ लंकूबाट ना६ख ५६१८ नम्बरको केरासहितको ट्रक आइतबार बिहान प्रहरीले नियन्त्रणमा लिएको छ ।
बिक्रीका लागि अवैध रुपमा चितवन ल्याउँदै गरेको भारतीय केरा नियन्त्रणमा लिइएको जिल्ला प्रहरी कार्यालय चितवनले जनाएको छ ।
कोरोना संक्रमणका कारण भारतीय फलफुल र तरकारी प्रवेशमा रोक लगाएकोले उक्त केरा नियन्त्रणमा लिइएको जिल्ला प्रहरी कार्यालय चितवनका प्रमुख प्रहरी उपरिक्षक नान्तिराज गुरुङले बताए ।
‘भारतबाट भित्रिएको केरा त्यसमा पनि क्वारेन्टाइन स्पष्ट नभएको पाइएपछि नियन्त्रणमा लिएका हौ’, एसपी गुरुङले भने ‘यसको अनुसन्धान थालेका छौ ।’
केरा पकाउने चेम्बरमा राख्ने क्रममा प्रहरीले ट्रकसहित पक्राउ गरेको हो । नेपालको ट्रकमा राखेर ल्याउँदै गरेको उक्त केरासहित ट्रकलाई पनि नियन्त्रणमा लिएर अनुसन्धान थालिएको प्रहरीको भनाइ छ ।
प्रहरीका अनुसार उक्त केरा व्यवसायी शिव सापकोटाले ल्याएको बुझिएको छ ।