१८ घण्टापछि खुल्यो नारायणगढ–मुग्लिन सडकखण्ड

मुग्लिन, चितवन । नारायणगढ–मुग्लिन सडक खण्ड संञ्चालनमा आएको छ । पहिरो खसेसँगै बुधबार बिहानबाट बन्द भएको राजमार्ग राति १० वजे देखि संञ्चालनमा आएको हो ।
नारायणगढ–मुग्लिन सडक आयोजनाका सूचना अधिकारी ईञ्जिनियर शिव खनालका अनुसार सो सडकको चार किलोमा पहिरोले ४५ मिटर सडक ढाकेको थियो ।
दुबै तर्फबाट लोडरले दिनभर लगाएर पहिरो पन्छाइएको उनले जानकारी दिए । सुरुवातमा खसेको पहिरो पन्छाए लगत्तै सोही ठाउँमा पुनः पहिरो खस्दा समय लागेको उनले बताए । पहिरो खसेसँगै सडक अवरुद्ध हुँदा सयौं सवारी सडकमा अलपत्र परेका थिए ।
सडक खुलेसँगै सवारीहरु गन्तव्यतर्फ लागेका छन् । सवारीको चापका कारण सवारी एकतर्फि मात्र सञ्चालनमा आएको जिल्ला प्रहरी कार्यालय चितवनले जनाएको छ ।