संक्रमित ३ निको भई घर फर्के, उपचाररत ४ जना

मंगलपुर, चितवन / विभिन्न कारणले विदेश गएका वडा नं. १६ का वासिन्दाहरु फिर्ता आएपछि हाल २८ जनालाई क्वारिन्टिनमा राखिएका छन् । उनीहरु सबैलाई १४ दिने क्वारिन्टिनमा राखिएको वडा अध्यक्ष अमृतराज हमालले जानकारी दिए । यसअघि आएका व्यक्तिहरुलाई १४ दिन राखिएको र कुनै लक्षण नदेखिएपछि घर फिर्ता पठाइ सकिएको वडाअध्यक्ष हमालले बताए ।
वडा अध्यक्ष हमालका अनुसार उनीहरुलाई पुरानो गाविस भवन र होम क्वारेन्टिनमा राखिएको छ । विदेशबाट आउनेहरु केही घरकै होम क्वारेन्टिनमा बस्छौं, सबै मापदण्ड अनुसार गर्छौँ भने पश्चात् वडाकै निगरानीमा व्यवस्थापन गरिएको उनले बताए ।
‘हालसम्म वडामा ७ जना कोरोना संक्रमित भेटिएको छ ।’ उनले भने, ‘जसमध्ये ३ जना निको भएर घर फर्किएका छन् भने ४ जना भरतपुर अस्पतालको आइसोलोसेनमा उपचाररत रहेका छन् ।’ उपचाररतहरुको पनि अवस्था सामान्य रहेको उनले जानकारी दिए ।
त्यसैगरी आज मंगलबार ९ जनाको स्वाब संकलन गर्ने तयारी भइरहेको छ । अन्यको अवस्था सामान्य देखिएको छ भने ९ जनामा कोरोना भाइरसको लक्षण देखिएकाले परीक्षण गर्न लागिएको उनको भनाइ छ ।
वडा नं. १६ मा पुरानो गाविस भवनमा १५ सिट, रेडक्रस भवनमा ७ सिट र चारपाते युवा समाज विजयनगरमा १३ सिट क्षमताको बेड तयार गरिएको छ भने अरु सिट क्षमता थप गर्ने व्यवस्थापन भइरहेको उनले बताए ।